اقوام متحدہ۔ 17 نومبر (اے پی پی) امریکہ پارینے کہ پاکستان نئے بیرہ ڈیہہ بلکن مچ آ دنیا ٹی ننا فائدہ غاتیکن المی ءِ۔ امریکی محکمہ خارجہ نا نائب ترجمان ویدانت پٹیل پریس حوال اٹی اسہ سوج اسے نا ورندی ٹی پارے کہ امریکہ پاکستان تون تینا متکن آ تعلقداری تے قدر انا نظراٹ ہرک و شونہال و جمہوری پاکستان امریکہ نا فائدہ غاتیکن مدام المی ءِ ہراٹی ہچ ءُ بدلی اس بتنے۔ اوپارے کہ نن اسہ سیاسی راہشون اسے نا مقابلہ ٹی ایلو نا یا اسہ سیاسی جماعت اسے نا مقابلہ ٹی ایلو سیاسی جماعت نا مخ تفی ءِ کپنہ ، نن جمہوری، آئینی و کانودی اصول آتیا پرامن وڑاٹ عملدرآمد نا مخ تفی ءِ کینہ۔ شونہال و جمہوری پاکستان امریکہ کن اہم ءِ۔ پاکستان تون ننا دیرینہ کمکاری پدریسہ برقرار ءِ۔ اوپاکستان تحریک انصاف نا چیئرمین عمران خان نا کنڈآن اقتدار نا چٹنگ آ امریکہ ءِ زموار گوندنگ نا دوبہ غاتے پدی ہلنگ نا بابت سوج انا ورندی ٹی پارے کہ نن پاکستان تون ہڑتوم آ کنڈآتا تعلقداری و قدر انا قابل ہڑتوم آ کنڈآتا شریداری نا کسر اٹی پروپیگنڈا و غلط گمانی یا غلط معلومداری تے بننگ کن الیپنہ۔ امریکی نائب ترجمان پارے کہ دُن کہ نن مہالو ہم پارینن کہ دادوبہ غاتیٹی وخت اس ہم سچائی متنے و نئے ارے و دا سرحال آ ننتون پین پاننگ کن اف۔ اومسکوہی وزیراعظم نا روس انا دورہ نا بابت سوج انا ورندی ءِ تننگ آن پاناد کرے۔
