جکارتہ۔ 16 نومبر (اے پی پی) چین نا وزیر خارجہ وانگ یی انڈونیشیا نا چین اتون کمکاری نا کوآرڈنیٹر و بحری امور و زرکاری نا وزیر لوہوت بی پانڈجیتان تون اوڑدہی کرے و جی 20 سروکی دیوان نا سرسہبی ءِ پک کننگ کن انڈونیشیا نا کوشست آتا ستاءِ کرے۔ چینی خبررساں ادارہ نا رداٹ وزیر خارجہ وانگ یی جولائی ٹی کروک آ انڈونیشیا نا صدر نا دورہ ءِ چین نا بارواٹی ہیت کرسا پارے کہ دورہ ٹی ہڑتوم آ ملک آک اسیجائی آخبت تون چین۔ انڈونیشیا کمیونٹی نا تعمیر ناعمومی سمت آ کاریم کننگ آ امناکرے۔ اوپارے کہ چین انڈونیشیا تون اواری اٹ کاریم کننگ کن تیار ءِ تانکہ ہڑتوم آ سربراہان مملکت نا نیام اٹ مروک آ اوڑدہی نا بھرمی نتیجہ اس دوئی مننگ کے۔ داوخت آ انڈونیشیا نا وزیر چین نا کمیونسٹ پارٹی نا 20 می قومی کانگریس نا سرسہبی آ اسہ وار ولدا مبارکباد پیش کرے و نیک است خواہی نا درشانی ءِ کرے۔ اوجی 20 بالی سروکی دیوان نا مہمانداری ٹی انڈونیشیا نا مخ تفی آ چین نا منت واری ءِ ہرفے۔ اوپارے کہ انڈونیشا چین اتون رابطہ و کمکاری ءِ سوگو کیک۔ اوپارے کہ انڈونیشیا چین اتون بڑزکو آب انا بیلٹ اینڈ روڈ کمکاری ءِ سوگو کننگ، اسیجائی آخبت تون چین۔ انڈونیشیا کمیونٹی نا اسیجائی تعمیر نا وژن ءِ عملی دروشم اس تننگ و ہڑتوم آ کنڈآتا کمکاری نا مون آ دننگ کن تیار ءِ۔