کابل۔ 14 نومبر (اے پی پی) اوغانستان نا دارالحکومت کابل اٹی اسلامی کمکار تنظیم (اوآئی سی ) نا سفارتی مشن نا پوسکن آ ماڑی نا بناءِ کننگانے۔ سعودی خبررساں ادارہ نا رداٹ تنظیم نا سیکرٹری جنرل ہیت کرسا طارق علی بخیت پارے کہ اوآئی سی اوغانستان نا تائید و مخ تفی نا قول آ سلوک ءِ و تینا قول و پیمان ءِ پورو کرسا کیک۔ داوخت آ کابل اٹی اوآئی سی نا دفترنا ڈائریکٹر ڈاکٹر محمد العیاش پارے کہ اوآئی سی نا سفارتی مشن نا نصب العین چندی چیلنج آتون مون تننگ نا بارواٹی اوغانستان نا کمک ءِ کرسا کننگ ءِ۔ اوغان وزیرخارجہ امیر خان متقی تینا تران اٹی پارے کہ اوغان کمامدار آک اوآئی سی ءِ غٹ درکار آسودہی فراوان کرسا کیرہ۔ دود اٹی جنرل سیکرٹریٹ نا ڈل کمکار سیکرٹری جنرل سیاسی امور یوسف الضبیحی نا کماشی ٹی ساڑی ئسر۔ اسلامی کمکار تنظیم (اوآئی سی ) سیکرٹری جنرل نا ایلچی طارق علی بخیت اوغانستان نا وزیر خارجہ امیر خان متقی و وزیرانصاف عبدالحکیم شریعی تون جتا جتا اوڑدہی کرے و اوفتے تون سیاسی ، کانودی، انسانی و اقتصادی ویل آتا بارواٹی گپ وتران کرے۔ داوخت آ اوغان وزیر خارجہ، او آئی سی نا باسک ملک آتا سفارتی مشن تا سروک، اقوام متحدہ، یورپی یونین و ایلو جہانی تنظیم آتا نمائندہ غاک ساڑی ئسر۔
