بیجنگ ۔ 10 نومبر (اے پی پی) چین اٹی پاکستان نا سفیر معین الحق پارینے کہ ننا ملک چین و دنیا تون تینا واپار نا مون آ دننگ کن چائنا انٹرنیشنل امپورٹ ایکسپو(سی آئی آئی ای) نا پلیٹ فارم ءِ کاریم اٹ اتنگ ءِ۔ اوچینی ویب سائٹ چائنا اکنامک نیٹ (سی ای این) ءِ پارے کہ سی آئی آئی ای پلیٹ فارم ءِ کاریم اٹ اتسا نن چین و دنیا تون واپار ءِ مون آ دننگ کن اواری اٹ کاریم کننگ اُن۔ اونا پاننگ ئس کہ دا نمائش مچ آ دنیا نا کمپنی تے تینا مصنوعات آتا نمائش، تینا برانڈ آتے مون آ دننگ و دنیا نا ارٹ میکو غٹ آن بھلا زرگزران اٹی پین کاروباری شریدار پٹنگ کن اسہ پلیٹ فارم اسے ہراٹی پاکستانی کمامدار، چاہندارو پوریاگر آتا پبی است خواہی ءِ خننگا۔ اوپارے کہ جہانی کاروباری برادری و جہانی تنظیم نا نمان بشخ ہلنگ جہانی برادری کن اسہ کلہو اس تسنے کہ چین واپار کن ملوک ءِ و برآمد کروک آتے دنیا نا غٹ آن بھلا صارف مارکیٹ اٹی تینا مصنوعات برآمد کننگ کن بخیر اٹ پاہک ۔ سفیر پارے کہ پاکستانی پوریاگر سی آئی آئی ای پلیٹ فارم ءِ کاریم اٹ اتسا چینی مارکیٹ اٹی کشت وکشار، سِل، بسکٹ نا مصنوعات ، کنفیکشنری آئٹم، سمندری خور، جوڑ مروک آ پچ، معدنیات ، کٹلری ، اِلار، گوازی تا گڑا، خشک میوہ ، لویس، فرنیچر، زیور و نہادی خل تا بشخ آتیٹی ملک انا گچین نمائندگی ءِ کننگ ءِ۔ پاکستانی سفارت خانہ نا واپاری قونصلر غلام قادر پارے کہ نن ہم پاکستان اٹی چینی کمپنی تا کنڈآن زرکاری نا ستاءِ کینہ وہراڑے دا چرجوئی ٹی بھاز گڑا کننگ مریک و نن دانا چاری اُن۔ اوپارے کہ چینی مارکیٹ اٹی پاکستانی مصنوعات نا ودوک آ رسینگ ءِ پک وڑاٹ پاکستان نا چین اتون واپاری نسخان ءِ کم کننگ و چینی مارکیٹ اٹی پوسکن ءُ وارخواہی پٹنگ اٹ کمک ایتک۔
