اسلام آباد۔ 04 نومبر (اے پی پی) وزیر دفاع خواجہ محمد آصف پارینے کہ مسکوہی وزیراعظم عمران خان آ جلہو ءِ سیاسی مسخت و سیاسی فائدہ غاتا دوئی کننگ نا ذریعہ جوڑ کننگپ، واقعہ نا پورو بایدے جاست وپاست مرے تانکہ اصل دوبہ داراآتسکان سرمننگ مرے۔ جمعہ نادے آ قومی اسمبلی ٹی گپ وتران کرسا خواجہ محمد آصف پارے کہ درو ہرا واقعہ مسنے اونا دا ایوان ہم مذمت ءِ کرینے، داٹی ہچ ءُ شک اس اف کہ دا ہندن ءُ واقعہ اسے ہرا ننکن من حیث القوم شکی گری نا سوب ءِ، دنیا ٹی دا سجفنگ انگ ءِ کہ ننا سوچ ہراکنڈا ہِننگ ءِ۔ وزیر دفاع پارے کہ حکومت خواہک کہ اگہ داواقعہ نا پد اٹ سازش اس ارے تو قوم انا مون آ بایدے برے تانکہ ویل انا تہہ اسکان سرمننگ مرے۔ اگہ اودے سیاسی رنگ تننگا تو مستین آنبار ننے معلوم مننگ کپک کہ دانا سوب آک انت ئسر۔ تاریخ اٹی داوڑنا چندی واقعہ مسنے۔ تدوک آ دہائی ٹی بے نظیر بھٹو شہید نا واقعہ مس، اونا شہیدی نا بابت چندی سوج آک ئسر ہرانا قوم اونا مار و اَرے ءِ ورندی ملنگ کتو۔ لیاقت علی خان تون انت کہ مس اونا بارواٹی ہم قوم ءِ ہچ ءُ معلومداری اس اف۔ ذوالفقار علی بھٹو نا بارواٹی سوج قوم ءِ داخاطران معلوم ءِ کہ انتئے کہ اسہ مسکوہی جج اس اعتراف کریسس کہ سزا کن اوڑا زور ئسک۔ وزیر دفاع پارے کہ داتم اسکان دوبہ دار نا ہرا ویڈیوک مون آ بسنو اوفتیان اسہ گڑاس پیدوار مننگ اٹی ءِ کہ واقعہ ٹی مذہبی گنوکی ءِ، دوبہ دار نا ویڈیو تا رداٹ مسکوہی وزیراعظم مستین اٹی ہرازبان ءِ کاریم اٹ ایسنے، و مذہب نا بابت ہرا دنگ ءِ کراس کرینے اونا نتیجہ ٹی داواقعہ مسنے۔ وزیر دفاع پارے کہ ہراتھانہ نا دنگ اٹی واقعہ مسنے وزیراعلیٰ مچ آ عملہ ءِ معطل کرسا اوفتے تینا ضلع ٹی ٹرانسفر کرینے۔
