اسلام آباد۔ 04 نومبر (اے پی پی) اسپیکر قومی اسمبلی راجہ پرویز اشرف تون جمعہ نادے آ یورپین یونین نا پارلیمانی ڈل اوڑدہی کرے۔ اوڑدہی ٹی پاکستان۔یورپی یونین تعلقداری و تین پہ تینی است خواہی نا ایلو امور آ گپ وتران کننگا۔ داوخت آ اسپیکر قومی اسمبلی نا پاننگ ئسک کہ پاکستان یورپی یونین تون تینا متکن آ خوشگوار تعلقداری تے بھاز اہمیت ایتک۔پاکستان و یورپی یونین نا پارلیمان تا نیام اٹ رابطہ غاتیٹی ودکی تین پہ تینی تعلقداری تے پین سوگو کننگ کن المی ءِ ،یورپی یونین پاکستان نا واپار و زرکاری نا بشخ آتیٹی اہم شریدار ءِ۔ اوپارے کہ چاگڑدی بدلی دنیا کن بھلو خطرہ اسے، دا بدلی تتون مون تننگ کن اسیجائی کوشست آتا گرج ءِ۔ راجہ پرویز اشرف پارے کہ پاکستان اسہ پرامن ءُ ملک اسے و ڈیہہ ناملک آتون خوشگوار تعلقداری تا خواہندار ءِ ، ملک راجی و اقتصادی بشخ آتیٹی شونداری نا کنڈا ہِننگ ءِ، منفی پروپیگنڈا غان پاکستان نا دروشم زہمی مننگ ءِ۔ اویورپی ڈل ءِ پارے کہ پاکستان نا پارلیمنٹ بنداوی انسانی حق انا فراوانی ءِ پک کننگ کن کانودسازی کرینے۔ ساڑی آ بھسکار نوکاپ آن پاکستان بھلو کچ اسے جانی و مالی نسخان مسنے۔ نوکاپ زہمی علاقہ غاتیٹی زہمی تے ویل مون تروک ءِ ، یورپی یونین نا کنڈآن نوکاپ زہمی تا بحالی کن تروک آ امداد ستاکڑزک۔ یورپین پارلیمنٹ نا باسک پارے کہ گوادر آن کشمیر اسکا ن مچ آ پاکستان نا جوان دورہ ءِ کرینن، پاکستان اسہ زیبا و پرامن ءُ ملک اسے اونا الس بھاز جوان ءُ، پاکستان نا دورہ غان پد پاکستان تون تعلقدار جوڑ تاثر بدل مسنے، دادورہ غان پد یورپ آ ہنسا پاکستان نا مثبت تشخص ءِ گچین وڑاٹ تالان کننگ نا کوشست کیوہ۔
