واشنگٹن۔ 03 نومبر (اے پی پی) امریکہ ٹی پاکستان نا سفیر مسعود خان پارینے کہ پاکستان و امریکہ تین پہ تینی پت ءِ ودفنگ نا سوب آن وسیع البنیاد تعلقداری تے مون آ دننگ ءُ۔ اوداہیت ءِ امریکی تھنک ٹینک اٹلانٹک کونسل، جون ہاپکنز یونیورسٹی، یونیورسٹی آف لاہور و اینگرو کارپوریشن نا کنڈآن پاکستان امریکہ تعلقداری تا آخبت آ اڈ ہلوک 2 دے ئی کانفرنس اٹی پارے۔ پاک امریکہ تعلقداری تا مون آ دننگ نا گمان آک روشنا ءُ۔ اوپارے کہ پاکستان و امریکہ نا تعلقداری داسہ بھارت و اوغانستان تون رابطہ ٹی بسنو، اومستی پارے کہ پاکستان و امریکہ نا نیام اٹ داسہ تنیا، وسیع البنیاد تعلقداری ءِ۔ کانفرنس نا بنائی سیشن اٹی امریکی تھنک ٹینک اٹلانٹک کونسل نا صدر فریڈ کیمپی و کامرس و کاروباری امور نا امریکی نمائندہ خصوصی دلاور سید ہم تران کرے۔ پاکستانی سفیر مسعود خان کانفرنس اٹی بشخ ہلنگ نا باوری کرفنگ آ اٹلانٹک کونسل نا صدر و ایلو کمکار آتا منت واری ءِ ہرفے۔ اوپارے کہ پاکستان و امریکہ گیشتر ڈیہہ نا بابت زمواری اتون اسہ یکتا ءُ وڑوڈول اس تیار کننگ ءُ۔ اوپارے کہ نن داوخت آ پوسکن آ تکنیکی دور اٹی اسہ وسیع البنیاد تعلقداری تے دُوارہ ترتیب تننگ و اول سرآن متحرک کننگ کن لگوک اُن۔ مستین اٹی امریکی پالیسی علاقائی توازن آ تالان ئسک و اوداسہ ہم بایدے ہمووڑ مرے۔ اوپارے کہ پاکستان و بھارت اتون امریکہ نا تعلقداری تینا وڑاٹ سلوک ءِ۔ مسعود خان پارے کہ پاکستان و امریکہ اسہ ایلو نا سٹریٹجک کلکولس و گرج آتے پہہ مریرہ۔ دُن تو پاکستان نا چین اتون سوگو تعلقداری ءِ ولے نن امریکہ تون ہم غٹ بشخ آتیٹی بھاز سوگو تعلقداری تا خواہندار اُن۔ اوپارے کہ اوغانستان آن امریکی فوجی تا پیش تمنگ آن پد اوفتا تعلقداری نا مطابقت و وڑانا بارواٹی بے پک و بے چینی ئسک ولے ہڑتوم آ کنڈآتا سفارتکاری داسہ رابطہ غاتے اسہ حداسکان ودفینے۔ اوپارے کہ تدوک آ 75 سال اٹی پاکستان و امریکہ چندی بشخ آتیٹی کمکاری نا میرات قائم کرینو۔ پاکستان ءِ امریکی مخ تفی آن زرگزرانی و عکسی وڑاٹ فائدہ مس و ہڑتوم آ ملک آک اواری اٹ سرد جنگ اٹی کمکاری نا کمک اٹ ، دہشت گردی تون مون ترسا، اقوام متحدہ نا قیام امن اٹی بشخ ہلسا و اسیجائی وڑاٹ بحری قزاقی نا برخلاف کارروائی کرسا دنیا ءِ رکھ کریر۔ اوپارے کہ نن جنگ و امن اٹی شریدار اُن و پاکستان ہر بشخ اٹی کمکاری ءِ برجاتخک، پاکستان اوغانستان آن بھلو کچ اسے آ پیش تمنگ اٹ امریکہ نا کمک ءِ کرے و امریکہ پاکستان نا کورونا دین آن بچفنگ کن ویکسین نا 7 کروڑ 90 لکھ خور فراوان کرے اوکان پد امریکہ پاکستان ءِ ویکسین فراوان کروک آ ٹاپ ڈونر ملک جوڑ مس۔
