مدینہ منورہ ۔ 03 نومبر (اے پی پی) سعودی عرب نا وزارت حج و عمرہ پارینے کہ مسجد نبوی نا ریاض الجنہ ٹی نماز کن پیشگی پرمٹ دوئی کننگ المی ءِ۔ سعودی خبررساں ادارہ وزارت نا کنڈآن ریاض الجنہ نا بابت ٹویٹر آ جاری بیان اٹی پارے کہ ہرافک ریاض الجنہ ٹی نماز ادا کننگ نا خواہش مند مریر او نسک یا توکلنا ایپ انا کمک اٹ اول پرمٹ دوئی کیر۔ وزارت پارے کہ نرینہ غاک ریاض الجنہ ٹی ہڑدے سہب انا 11 بجہ غان خفتن نا نماز اسکان و نن نا 12 ءُ نیم بجہ غان سہب انا نماز اسکان نماز خواننگ کیرہ۔ ریاض الجنہ ٹی زائر زالبول آک سہب انا نماز آن پد آن سہب انا 11 بجہ و خفتن آن پد آن نن نا 12 بجہ اسکان بکنگ کرفنگ کیرہ۔ وزارت نا رداٹ نماز نا وخت انا بناکننگ آن چار گھنٹہ مست اسکان بکنگ اعتمرناایپ انا کمک اٹ منسوخ کرفنگ مریک و اولیکوپرمٹ نا دورانیہ چٹنگ آن پد پوسکن آ پرمٹ ءِ جاری کرفنگ مریک۔
