بیجنگ۔ 31 اکتوبر (اے پی پی) چین اٹی پاکستان نا سفیر معین الحق پارینے کہ پاکستان و چین واپار ، زرکاری، انفراسٹرکچر، صنعت، کشت وکشار و آئی ٹی نا اہم بشخ آتیٹی کمکاری ءِ پین ودفرہ۔ داہیت ءِ او سے شنبے نادے آ وزیراعظم شہباز شریف نا دورہ غان مست چینی اخبار گلوبل ٹائمز ءِ تروک آ اسہ انٹرویو اسے ٹی پارے۔ اوپارے کہ پاکستان ہمو منہ ملک آتیٹی اوار ءِ ہرافتے کمیونسٹ پارٹی آف چائنا نا 20 می نیشنل کانگریس نا سرسہب اڈتننگ آن پد چین اٹی بٹنگ انگانے ہرا ہڑتوم آ ملک آتا نیام اٹ خصوصی سنگتی و اسٹریٹجک تین پہ تینی پت انا استعارہ ءِ۔ اوپارے کہ وزیراعظم دورہ ٹی چینی راہشون، سینئر عہدیدار و کاروباری برادری نا نمائندہ غاتون اوڑدہی کیک و اہم علاقائی و جہانی امور خاص وڑاٹ دینی مرض، چاگڑدی بدلی، کبینی و نیزگاری کون آ جہانی چیلنج آتون مون تننگ اٹ کمکاری آ گپ وتران کیک، دا اوڑدہی تیان ننے تینا ہڑتوم آ کنڈآتا تعلقداری تا جاچ ءِ ہلنگ وواپار ، زرکاری ، بنداوی پنجر ، صنعت ، کشت وکشار و آئی ٹی نا اہم بشخ آتیٹی کمکاری ءِ پین ودفنگ نا گچین وارخواہی فراوان مریک۔ اوپارے کہ ہڑتوم آ ملک آتا نیام اٹ مشکل وخت اٹی کوپہ تون کوپہ ملفسا سلنگ نا آہنی شریداری داہیت انا ڈیک ءِ کہ نوکاپ اٹی چین نا پاکستان کن پبی مخ تفی تون اوار اوار بیلٹ اینڈ روڈ گام (بی آر آئی) نا رداٹ چین پاکستان اقتصادی راہداری (سی پیک) کن برجا کمکاری ءِ پین مون آ دننگ و ساڑی آ قدرتی آفت آن ملک انا بحالی ٹی پوسکن آ رفتار ءِ درستی راستی کرفنگ ءِ۔ پاکستانی سفیر معین الحق پارے کہ چین پاکستان اقتصادی راہداری (سی پیک) ہڑتوم آ ملک آتا نیام اٹ اقتصادی کمکاری و رابطہ غاتے تین پہ تینی ایجنڈا ٹی مرکزی اہمیت تننگ ءِ۔
