اقوام متحدہ۔ 28 اکتوبر (اے پی پی) اقوا م متحدہ ٹی پاکستان نا آخبتی مندوب منیر اکرم جنرل اسمبلی نا صدر ساباکوروسی و سلامتی کونسل نا صدر مائیکل بیانگ تون اوڑدہی کرے و وزیرخارجہ بلاول بھٹو زرداری نا چٹھی ءِ اوفتا دوٹی تس ہراٹی او بھارت نا غیرکانودی کوزہ ٹی جموں وکشمیر نا خطرناک حالیت آتا بارواٹی معلومدار کرینے۔ اقوام متحدہ وزیرخارجہ نا چٹھی ءِ سلامتی کونسل و جنرل اسمبلی نا دستاویز نا وڑاٹ جاری کیک۔ داکان مست پاکستان نا مندوب کشمیر نا ویل آ اڈ ہلوک ویبینار اٹی پارے کہ پاکستان کم و ود ہرتُو سلامتی کونسل ءِ بھارت نا کوزہ گیری ٹی جموں وکشمیر نا بدل مروک آ حالیت آتیان معلومدار کرسا کاہک۔ اوپارے کہ وزیر خارجہ نا چٹھی دنیا ءِ کشمیر نا بدل مروک آ حالیت و بھارت نا برجا ظلم و بربریت آن معلومدار تخنگ نا کوشست آتا بشخ اسے۔ یات سلے کہ پاکستان و مچ آ دنیا ٹی رہینگوک آ کشمیریک 27 اکتوبر آ کشمیر تہاردے اڈ تسر ۔ بھارت 27 اکتوبر 1947آجموں وکشمیر آ جبری کوزہ کرے و داتم اسکان کشمیری تیا ظلم و بربریت نا چرجوئی ءِ برجاتخانے۔
