اسلام آباد۔ 20 اکتوبر (اے پی پی) قومی اسمبلی ءِ وزارت آبی وسیلہ نا کنڈآن پاننگانے کہ نوکاپ و ترند پِر تا سوب آن چترال تون اوار مچ آ ملک اٹی مروک آ نسخان تے پورو کننگک۔ پنچ شنبے نادے آ قومی اسمبلی ٹی وقفہ سوج آتیٹی مولانا عبدالاکبر چترالی نا فیڈرل فلڈ کمیشن نا بابت سوج انا ورندی ٹی وزارت آبی وسیلہ نا کنڈآن نوشتہی وڑاٹ تروک آ ورندی ٹی قومی اسمبلی ءِ پاننگاکہ 1976ء آن مست صوبائی حکومت آک نوکاپ آن رکھ انا پروجیکٹ آتا ڈٹ بندی ، نظم و نسق و عملدرآمد نا زموار ئسر۔ 1973 ء و 1976 ء نا بھسکار نوکاپ آک نجی و سرکاری ملکیت آتے بھلو نسخان اس تسر ہراڑآن دا گڑا پاش مریک کہ ملکی کہول آ نوکاپی حالیت آتون گچین وڑاٹ مون تننگ کن نظم و نسق کن صوبائی کہول آ نوکاپ آن رکھ اکن ساڑی آسراتی و ڈٹ بندی گنج اس اَلوکہ و مربوط رسینگ نا کمتی ئسک۔جنوری 1977ء ٹی اڈ ہلوک آ بین الصوبائی رابطہ کانفرنس اٹی دا ویل آ شرہ کننگا ہراٹی بنجائی حکومت فیصلہ کرے کہ دریاکنارہ واقعہ بالائی و زیریں صوبہ غاتا گڑتی تے مون آ تخسا ملکی کہول آ نوکاپ نا بابت مربوط و جوان بست وبند کن بنجائی کہول آ ادارہ اس جوڑ کننگے چنانچہ فیڈرل فلڈ کمیشن اس ٹہیفنگا و چار جنوری 1977 ء آ اونا اعلامیہ ءِ جاری کننگا اوکان پد مولانا عبدالاکبر چترالی نا ضمنی سوج انا ورندی ٹی پارلیمانی سیکرٹری ذوالفقار باچانی پارے کہ چترال اٹی نوکاپ آن مروک آ نسخان تے پوروی ءِ سروے آن پد کننگک۔ مولانا جمال الدین نا سوج انا ورندی ٹی پارلیمانی سیکرٹری ذوالفقار باچانی پارے کہ نوکاپ و پِر تیان انت کہ نسخان اس مسنے نن ادائیگی کینہ۔
