اسلام آباد۔ 20 اکتوبر (اے پی پی) ڈپٹی اسپیکر زاہد اکرم درانی مولانا عبدالاکبر چترالی نا وزارت مذہبی امور تون تعلقدار حج کمکار آتا بابت سوج ءِ قائمہ کمیٹی مذہبی امور نا دوٹی تس۔ پنچ شنبے نادے آ قومی اسمبلی ٹی وقفہ سوج آتیٹی مولانا عبدالاکبر چترالی نا سوج انا ورندی ٹی وزارت مذہبی امور نا کنڈآن نوشتہی ورندی ٹی پاننگاکہ سرکاری حج اسکیم نا رداٹ 2022 ء ٹی بنجائی دارالحکومت اسلام آباد آن 1857 ، پنجاب آن 16777 ، سندھ آن 7640، کے پی آن 5425 ، بلوچستان آن 1572، جی بی آن 370، آزاد کشمیر آن 330 و فاٹاغان 417 بندغ آتون اوار جم وڑاٹ 34388 بندغ حج کریر۔ حج 2022ء کن ہر چار آ صوبہ، اسلام آباد، جی بی و آزاد کمشیر آن 239 خدام الحجاج ءِ گچین کننگا۔ مولانا عبدالاکبر چترالی خدام الحجاج نا کچ انا بابت شدید ردعمل نا درشانی ءِ کرسا پارے کہ داکچ درست اف، 800 آن زیات خدام الحجاج ءِ دننگا۔ وزارت مذہبی امور نا کنڈآن غلط ورندی آن ننا استحقاق مجروح مسنے ، داسوج ءِکمیٹی نا دوٹی تننگے۔ مولانا عبدالاکبر چترالی نا ریمارکس آ وزیرمملکت کانود و انصاف شہادت اعوان پارے کہ حج کمکار آتا کچ انا بابت ورندی وزارت مذہبی امور تسنے، اگہ فاضل باسک ءِ داڑا اعتراض اس ارے تو وزارت آن اَرفسا دُوارہ اونا ورندی ءِ ایتک۔ ڈپٹی اسپیکر سوج ءِ قائمہ کمیٹی مذہبی امور نا دوٹی تس۔
