اقوام متحدہ۔ 23 ستمبر (اے پی پی) اقوام متحدہ پارینے کہ پاکستان ءِ وام تروک آ ملک آک وام تا پدی تننگ اٹ ریلیف تننگ آ سجفر تانکہ پاکستانی کمامدارآک نوکاپ آن زہمی تیکن کمکی سرجزآتیا زیات چکار تخنگ کیر۔ جرمن نشریاتی ادارہ نا رداٹ برطانوی اخبار فنانشئل ٹائمز اقوام متحدہ نا اسہ پالیسی دستاویز اسے نا حوالہ ءِ ترسا پارینے کہ نوکاپ نا سوب آن پاکستان نا مالیاتی تنکی ٹی بھاز ودکی مسنے ہنداخاطرآن پاکستان ءِ جہانی وام تا زرتس اٹی ریلیف ووام تا تنظیم ءِ نو کننگے۔ پاکستان اٹی ساڑی آ نوکاپ آن 3 کروڑ 30 لکھ بندغ زہمی مسنو و 1576 بندغ زوال کرینو۔ ولے مرک آتا اصل کچ داکان زیات مننگ کیک وخت اس کہ نسخان تا کساس 30 ارب ڈالر آن زیات نا ءِ۔ اخبار پارے کہ پالیسی دستاویز ، ہرادے اقوام متحدہ نا شونداری پروگرام (یواین ڈی پی ) ہندا ہفتہ حکومت پاکستان تون شیئر کیک، ٹی پاننگانے کہ ملک ءِ وام تروک آ ملک آک وام تا پدی تننگ اٹ ریلیف تننگ آ سجفر تانکہ پاکستانی پالیسی ساز آتے وام تا زرتس آ تینا چکار ءِ کننگ نا جاگہ غا نوکاپ نا بھسکاری آن ودی مروک آ حالیت آتے مون آتخسا راحت و کمکی کاریم تے اولیت تننگ نا زیات موقع ملنگ کے۔ حکومت پاکستان و اقوام متحدہ نا سیکرٹری جنرل انتونیوگوتریس نوکاپ کن چاگڑدی بدلی ءِ زموار گوندانو۔ اخبار نوشتہ کرینے کہ پالیسی دستاویز اٹی وام تا تنظیم نو یا تبادلہ نا سلاہ پیش کننگانے، ہرانا رداٹ وام تروک آک پاکستان نا کنڈآن موسمیاتی بدلی تیان بچوک آ انفراسٹرکچر نا تیاری ٹی زرکاری آ رضامندی نا بدلہ ٹی وام تا زرتس آتیٹی ریلیف فراوان کیرہ۔
