اقوام متحدہ۔ 22 ستمبر (اے پی پی) اقوام متحدہ نا سیکرٹری جنرل انتونیوگوتریس قرن افریقہ ٹی دمدستی کمکی کارروائی تیکن پورو فنڈنگ نا اپیل کرینے۔ اوجنرل اسمبلی نا دیوان اٹی اسہ ویڈیو کلہو اسے ٹی پارے کہ قرن افریقہ نا چندی بشخ جبوتی، اریٹیریا ، ایتھوپیا، کینیا و صومالیہ ٹی لکھ آ مخلوق کم و ود نیمہ ٹی بدترین خشک سالی مون تروک ءِ۔ اوخبڑدار کرینے کہ قرن افریقہ ٹی قحط و خشک سالی آن بھاز انگا مخلوق زہمی مننگ ءِ۔ اوپارے کہ اگہ نن دمدستی کمکی کارروائی کتون تو بروک آ بھسکاری آن چندی مخلوق زوال مننگ کیرہ۔ اوقرن افریقہ ٹی دمدستی فنڈنگ، خور، جان جوڑی نا خیالداری و غذائیت آن ہلیس دیر و سفائی نا خذمت آتا دمدستی گام گیج آتیا زور شاغا۔ او غٹ فریق آتیا زور شاغا کہ او جہانی انسانی کانود نا شرف ءِ کیر و ضرورت مند مخلوق اسکان رکھ و بلاروک ٹوک رسینگ ءِ پک کیر۔
