اقوام متحدہ۔ 19 ستمبر (اے پی پی) اقوام متحدہ نا جنرل اسمبلی نا 77 می سالانہ دیوان پگہ (سے شنبےنادے آ) بناکیک۔ دیوان اٹی امن و سلامتی نا بابت امور آ چکار کننگک۔ کورونا دین انا جہانی دین آن پد اولیکو وار دا دیوان اٹی باسک ملک آتا سربراہان مملکت و حکومت و ایلو عہدیدارآک بشخ ہلنگ اٹی ءُ۔ وزیراعظم پاکستان محمد شہباز شریف جنرل اسمبلی آن تینا تران اٹی پاکستان اٹی ساڑی آ تباہ کن نوکاپ اٹی چاگڑدی بدلی تا کڑد ءِ تالان کیک۔ نیویارک اٹی اقوام متحدہ نا صدر دفتراٹی دیوان کن سخت رکھی گام گیج کننگانے۔ دیوان اٹی گمانی وڑاٹ زیر بحث بروک آویل آتیٹی دنیا ناچندی بشخ آتیٹی برجا جھیڑہ، چاگڑدی بدلی، کورونا دین انا جہانی دین انا سوب آن نیزگاری، بین و بے بریبری ٹی مروک آ ودکی ہراڑآن محروم تبہ خاص وڑاٹ زہمی مننگ اٹی ءُ۔ اقوام متحدہ ٹی پاکستان نا آخبتی مندوب منیر اکرم اے پی پی ءِ پارے کہ دادیوان اٹی چاگرڈی بدلی تیا شرہ ننکن خاص ءُ اہمیت اس تخوک مریک۔ اوپارے کہ وزیراعظم پاکستان شہباز شریف نا 23 ستمبر آ جنرل اسمبلی آن تران اٹی پاکستان اٹی نوکاپ آن بھلو کچ اسے آ بھسکاری و چاگڑدی بدلی و جہانی حدت اٹی ودکی نا خطرہ غاتے تالان کننگک ۔ دیوان اٹی چاگڑدی بدلی تانتیجہ ٹی کسادبازاری نا خطرہ غاہم سجفنگک۔ دیوان اٹی زیر بحث بروک آ ایلو ویل آتیٹی کشمیر نا ویل، فلسطین نا ویل، اوغانستان، ایران نا جوہری معاہدہ غا مذاکرات و کوریائی ڈیہہ نا حالیت آک اوار ءُ۔ اوپارے کہ اقوام متحدہ نا جنرل اسمبلی نا دیوان نا وخت آ ، وزیراعظم افریقی یونین، یورپی یونین و امریکہ نا کنڈآن اسیجائی وڑاٹ اڈ ہلوک آ گلوبل فوڈ سیکورٹی سمٹ وکوپ ۔ 27 اٹی بشخ ہلیک۔ او پارے کہ گلوبل فوڈ سیکورٹی سمٹ وکوپ ۔ 27 موسمیاتی بدلی آ گپ وتران، جہانی برادری کہول آ مون تروک اہم چیلنج آتون مون تننگ کن گچین گام گیج آتیا سجفنگ کن اہم ءُ پلیٹ فارم اس جوڑ مریک۔ اوپارے کہ وزیراعظم چندی ملک آتا تینا ہم منصب، جنرل اسمبلی ناصدر، سیسا باکوروس، اقوام متحدہ نا سروک تون اوار اوار جہانی تنظیم، جہانی مالیاتی ادارہ و سخی تنظیم تا سروک آتون اوڑدہی کیک۔ اقوام متحدہ نا سیکرٹری جنرل و امریکی صدر جوبائیڈن نا کنڈآن تروک آ بیابخیری ٹی راہشون تے گپ وتران نا موقع ہم ملک و وزیراعظم شہباز شریف جہانی میڈیا تون ہم گپ وتران کیک۔ وزیرخارجہ بلاول بھٹو زرداری جی ۔ 77 و چین نا وزراء خارجہ ناسالانہ دیوان و اوآئی سی وزراء خارجہ نا سالانہ کوآرڈنیشن دیوان نا کماشی تون اوار اوار کیہی بڑزکو کہول انا دیوان تیٹی بشخ ہلیک، چندی ملک آتا وزیر خارجہ غاتون اوڑدہی، تھنک ٹینک آن تران و او آئی سی رابطہ ٹولی جموں وکشمیر نا دیوان اٹی ہم بشخ ہلیک۔
