اسلام آباد۔ 18 ستمبر (اے پی پی) کینیڈا نا حکومت خالصتان ریفرنڈم نا کمک اٹ سکھ آتے تینا سلاہ نا درشانی ءِ کننگ آن توننگ آن انکار کرسا اودے کینیڈین کانود نا کانودی پیراٹی اسہ پرامن و جمہوری عمل اس گوندانے۔ اسہ ہندو مندراسے آ جلہو و خالصتان سکھ راہشون اسے نا پوسٹر ءِ اَرینگ اِنگ آن پد ودی مروک آ حالیت آتیا تران کرسا کینیڈین حکومت نا اسہ عہدیدار اسے نا پاننگ ءِ کہ کینیڈین شاری تے سلاہ درشانی نا آجوئی نا بابت کینیڈین کانود نا رداٹ تینا سلاہ و خیال آتا درشانی نا پورو آجوئی دوئی ءِ۔ کینیڈین حکومت نا کنڈآن دا بیان بھارتی حکومت نا کنڈآن پروپیگنڈاغان پد بس ہراٹی کینیڈا نا حکومت آ زور شاغنگا کہ او کینیڈا ٹی خالصتان نا مخ تف آتا برخلاف کارروائی کے ہرا دہ لکھ آن زیات سکھ آتا اُرا ءِ۔ خالصتان کن اسہ ہائی پروفائل مہم خالصتان و جتائی پسند ٹولی سکھز فار جسٹس چلیفنگ ءِ۔ جہانی میڈیا نا حوال آتا رداٹ بھارتی حکومت 18 ستمبر آ اونٹاریو نا برامپٹن اٹی گورمیڈوز کمیونٹی سینٹر اٹی خالصتان ریفرنڈم نا ووٹنگ آن مست کینیڈین حکومت آ سفارتی زور شاغنگ نا کوشست کرے۔ ووٹنگ نا تیاری تیکن ہفتہ نادے آ سد آ سکھ مرکز اٹی مچ مسر۔ کینیڈین کمامدارآتا بابت پاننگاکہ کینیڈا نا شاری تے ہروڑنا سیاسی سرگرمی تیٹی بشخ ہلنگ و پرامن و جمہوری وڑوڈول آتے اٹ تینا حق انا خواست ءِ کننگ نا حق آن محروم کننگ مفک۔ کینیڈا ناپارلیمنٹ نا باسک سکھ مندر سنگھ دھالیوال نا ہم پاننگ ءِ کہ آئینی و جمہوری سیاسی درشانی ءِ توننگ مفک۔ سکھز فار جسٹس نا کونسل جنرل و نیویارک اٹارنی گروپتون سنگھ پنن پارے کہ بھارتی حکومت سکھ آتے دیکی نا مون آ انتہاپسند نا وڑاٹ پیش کننگ کن ہر چم ءِ کاریم اٹ ایس ولے جمہوری حکومت آک بھارتی زور اٹی بننگ آن انکار کریر۔ اوپارے کہ ووٹنگ نا عمل پورو مننگ آن پد کیس ءِ اقوام متحدہ ٹی ہرفنگک۔ گروپتون سنگھ پنون داہیت انا درشانی ءِ کرے کہ سکھز فار جسٹس و ایلو خالصتان نواز تنظیم تا بیدادی تون ہچ ءُ تعلق اس اف۔ ننا مسخت وونٹ انا واک انا کاریم اٹ اتنگ ءِ، سم آخا، بھارت امن کن ننا نقطہ نظر آن خارکیک۔ سکھز فار جسٹس نا پالیسی ڈائریکٹر جتندر سنگھ گریوال پارے کہ خالصتان ریفرنڈم نا ویل آجوئی درشانی نا حق انا دنگ اٹی بریک، ہرا اسہ بنداوی ءُ حق اسے ہرا کینیڈا نا غٹ شاری تے دوئی ءِ۔ بھارت ءِ دااصول ءِ پہہ مننگ اٹ دشواری مون تروک ءِ انتئے کہ اوسجفوک وڑاٹ تینا ریاست نا تینا حق اکن توار بڑز کروک آتے ڈوہدار کرینے و اینو لکھ آ سکھ ہراتینا حق خودارادیت ءِ کاریم اٹ اتنگ خوارہ اوفتے دہشت گرد گوندنگک۔ اوپارے کہ داسہ بھارت دانظام ءِ دیکی آ ہم خلنگ نا کوشست کننگ اٹی ءِ، ولے کینیڈین چارٹرآف رائٹس اینڈ فریڈم داحق انا ضمانت ایتک و اسہ ہم بھارتی زور اس داحقیقت ءِ بدل کپک۔ میڈیا حوال آتا رداٹ مودی نا حکومت کن ایلو ملک آتا دارالحکومت آتیٹی ہزار آ سکھ آتا یکجا مننگ و بھارت آن آجوئی و خالصتان نا آجوریاست نا جوڑ کننگ نا خواست اسہ تکلیفی ءُ منظر اسے۔ سکھ جتائی پسندی نا ویل منہ سال مست وزیراعظم ٹروڈو نا دورہ بھارت اٹی جھیڑہ غاتا اسہ بھلو سوب اس ئسک۔ بھارتی حکومت کینیڈا نا کمامدارآتیا کینیڈا ٹی خالصتانی تتون نرمی کننگ نا پاش آن پاش دوبہ خلکوسس۔ بھارتی حکومت کینیڈا نا حکومت آن خواست کرے کہ او مخلوق ءِ بیدادی آ ہُشکا تننگ و دہشت گرد آتے شہید آتا درجہ تننگ کن سلاہ درشانی نا آجوئی نا حق انا غلط کاریم اٹ اتنگ آن تورے ولے سکھز فارجسٹس بھارتی حکومت نا دا موقف ءِ سختی اٹ مسترد کرے۔ میڈیا نا رداٹ داہفتہ نا بناٹی ، بھارتی کمامدارآک کینیڈین حکومت تون سخت برانز نا بنا ءِ کریر ہراتم ٹورنٹو ٹی بی اے پی ایس سوامیزائن مندر اٹی 18 ستمبر آ خالصتان ریفرنڈم ووٹنگ آن مست پترینگوک آ درگہ غا نوشتہ کروک آ بھارت مخالف و خالصتان نا حق اٹی نعرہ غاتون توڑ پھوڑ کننگا۔ بھارت رسمی وڑاٹ 2021 اٹی کینیڈا نا انتظامیہ ءِ اسہ درخواست اس جمع کرفیسس ہراٹی سکھز فار جسٹس آ پابندی نا خواست کننگاسس۔ ولے کینیڈین حکومت نا کنڈآن نیام تمپننگ و ریفرنڈم ءِ اڈترسا خنسا دا نتیجہ ءِ اخذ کننگ مریک کہ بھارتی خواست آتیا کس اس خف توتہو۔ کینیڈا نا وزیراعظم نا پاننگ ءِ کہ ای نمے یات ترفیوہ کہ کینیڈا پرامن برانز نا حق انا دفاع کن مدام ساڑی سلک۔ نن گپ وتران نا اہمیت آ یخین تخنہ و ہندا سوب آن نن تینا گڑتی تے تالان کننگ کن چندی ذریعہ غاتے اٹ براہ راست بھارت کمامدارآتسکان سرکرینے۔
