لندن۔ 18 ستمبر (اے پی پی) برطانیہ نا کیہی پارلیمنٹ نا باسک آک و اسلامی ادارہ غاک برطانوی حکومت آن خواست کرینو کہ او ہندو انتہاپسندسادھوی نشار یتھمبارا نا اسلاموفوبک بیان تا سوب آن اونا ملک اٹی پترینگ انگ آ پابندی خلے۔ کشمیر میڈیا سروس نا رداٹ سادھوی نشا‘‘درگاواہنی’’ پنی ءُ تنظیم اسے نا سروک ءِ ہرا وشوا ہندو پریشد (وی ایچ پی ) نا زالبول ونگ ءِ۔ ہندو انتہاپسند تنظیم وی ایچ پی بھارت نا حکمران جماعت بھارتیہ جنتا پارٹی (بی جے پی ) نا سیوتی ءِ ہرانا دور حکومت اٹی بھارت اٹی مسلم مخالف بیدادی و خار اٹی ترندی اٹ ودکی مون آ بسنے۔ سادھوی نشا20 آن 24 ستمبر اسکان برمنگھم، بولٹن، کوونٹری، ناٹنگھم و لندن نا مندر آتا دورہ ءِ کننگ والا ءِ۔ لیبرپارٹی نا باسک پارلیمنٹ سیم ٹیری و یاسمین قریشی ئسک اونا دورہ برطانیہ نا مخالفت ءِ کرینو۔ مسلم انگیج منٹ اینڈ ڈویلپمنٹ (ایم ای این ڈی) ہم اونا دورہ برطانیہ غا گڑتی نا درشانی ءِ کرے۔ تنظیم نا ترجمان امان علی پارے کہ ننے داہیت آ بھاز گڑتی ءِ کہ سادھوی برطانیہ ٹی ہندو و مسلم آبادی نا نیام اٹ ساڑی آ ہم گرنچی ءِ خطرہ ٹی شاغک۔ اوپارے کہ ہندو انتہاپسند زالبول نا خارتس و اسلاموفوبک بیان تا برطانوی راج اٹی ہچ ءُ جاگہ اس اف۔
