اسلام آباد۔ 18 ستمبر (اے پی پی) وزیراعظم محمد شہباز شریف اقوام متحدہ نا جنرل اسمبلی نا 77 می دیوان اٹی بشخ ہلیک۔ دفترخارجہ نا کنڈآن جاری سرجم حوال آتا رداٹ وزیراعظم محمد شہباز شریف اقوام متحدہ نا جنرل اسمبلی (یواین جی اے) نا 77 می دیوان اٹی بشخ ہلیک، ہرا 19 آن 23 ستمبر 2022ء ا نیویارک اٹی اڈہلنگ ءِ۔ وزیراعظم تون وزیرخارجہ بلاول بھٹو زرداری تون اوار کابینہ نا ایلو باسک آک و بڑزکو کمامدارآک ہم ڈل اٹی اوار مریرہ۔ وزیراعظم 23 ستمبر آ جنرل اسمبلی آن تران کیک۔ تینا تران اٹی وزیراعظم ساڑی آ موسمیاتی بدلی نا سوب آن ملک اٹی تباہ کن نوکاپ آن ودی مروک آ حالیت آتے تالان کیک۔ وزیراعظم موسمیاتی بدلی آن مون تروک خطرہ غاتا بابت تینا سلاہ تے ہم پیش کیک۔ داکان بیدس وزیراعظم بھارت نا غیر کانودی کوزہ گیری ٹی جموں و کشمیر تون اوار بھلو وخت اسے آن اقوام متحدہ نا ایجنڈا ٹی ساڑی بے ایسر مروک جھیڑہ غاتون اوار علاقائی و جہانی ویل آتا بابت پاکستان نا گڑتی و نقطہ نظر ءِ ہم تالان کیک۔ یو این جی اے نا دیوان نا وخت آ وزیراعظم افریقی یونین، یورپی یونین و امریکہ نا شریداری اٹ اڈ ہلوک گلوبل فوڈ سیکورٹی کانفرنس اٹی بشخ ہلنگ آن بیدس موسمیاتی بدلی ویل آتا چٹفنگ نا بابت سی او پی 27 نا دیوان اٹی ہم بشخ ہلیک۔ ہراٹی کیہی جہانی راہشونک بشخ ہلیرہ۔ یات سلے کہ دا پلیٹ فارم ساڑی آ دوراٹی جہانی برادری ءِ مون تروک خطرہ غاتا ایسری نا بابت جہانی کہول آ گام گیج آتا چرجوئی ٹی بھاز گچین پک مننگ کیک۔ وزیراعظم جنرل اسمبلی نا دیوان نا وخت آ جنرل اسمبلی نا صدر، اقوام متحدہ نا جنرل سیکرٹری، جہانی ادارہ غاتا سروک ، آئی ایف آئیز و خذمت خلق انا ادارہ غاتا سروک آتون اوار چندی ملک آتا تینا ہم منصب آتون ہم اوڑدہی کیک۔ وزیراعظم داوخت آ جہانی میڈیا تون ہم گپ وتران کیک۔ اقوام متحدہ نا جنرل اسمبلی نا دیوان اٹی وزیر خارجہ بلاول بھٹو زرداری ہم چندی پروگرام تیٹی بشخ ہلیک ہرافتے ٹی بڑزکو کہول انا دیوان تیٹی بشخ ہلنگ و چندی ملک آتا تینا ہم منصب آتون ہڑتوم آ کنڈآتا تعلقداری میڈیا و تھنک ٹینکس اتون اوڑدہی تیان بیدس جی 77 و چین نا وزرائے خارجہ نا سالانہ دیوان اٹی بشخ ہلنگ و جموں وکشمیر آ او آئی سی نا رابطہ ٹولی نا دیوان اٹی بشخ ہلنگ ہم اوار ءِ۔ کثیر القومی سرجزآتا مرکز مننگ نا سوب آن اقوام متحدہ اسہ اہم ءُ جہانی ادارہ اسے ہرا جہانی امن و سوگوی، شونداری و انسانی حق آن بیدس مچ آ دنیا ٹی پائیدار امن و شونداری نا فراوانی کن بنداوی کڑد اس تخک۔ مچ آ دنیا نا ملک آتا نمائندگی مننگ نا سوب آن جنرل اسمبلی جہانی برادری ءِ اسیجائی مسخت آتا دوئی کننگ و اسیجاویل آتا چٹفنگ کن اسہ بھلو پلیٹ فارم اس پیش کیک۔ وزیراعظم نا یواین جی اے نا دیوان اٹی بشخ ہلنگ پاکستان نا کثیر الجہتی مسخت آتا دوئی کننگ اٹ کمکار مریک انتئے کہ اقوام متحدہ دنیا امن و سوگوی نا مون آ دننگ و جہانی امور نا بابت اہم ءُ کڑد اسے نا حامل ادارہ ءِ۔ پدتموک ملک آتا گروپ آف 77 و چین اتون اوار اوار او آئی سی نا وزرائے خارجہ نا کونسل نا چیئرمین نا حیثیت اٹ پاکستان جہانی کہول آ امن، سوگوی، پائیدار شونداری، انسانی حق غٹ اکن تون اوار ایلو جہانی ویل آتا چٹفنگ کن اقوام متحدہ نا چارٹرنا رداٹ کڑد ادا کننگ کن سنبرینگوک ءِ۔
