کوئٹہ۔ 23 جون (اے پی پی): بلوچستان ءِ سر وزیر میر سرفراز بگٹی ءَ گشتگ ناشرکار بلوچستان ءِ ورناہاں وتکوش جوڑ کنگ ءَ انت وھدیکہ ما ایشانی واستہ آکسفورڈ ءُ ہارورڈ یونیورسٹی ءَ ہوار ہائیر ایجوکیشن ءِ دروازگاں پچ کنگ ءَ ایں ۔ بلوچستان ءَ ناشرکاری ءِ ھلاپ ءَ جنگ برجاہ اِنت ۔ ما ھمک جیڑہ ءِ گیش ءُ گیوار ءَ گپ ءُ تران ءِ وسیلہ ءَ لوٹیں بلے بدبھتی ایش انت کہ آ گپ ءُ تران ءِ بدل ءَ تپنگ ءِ وسیلہ ءَ گپ کنگ ءَ انت۔ اے ھیالانی درشانی آئی ءَ دو شمبے ءِ روچ ءَ جیکب آباد ءَ میڈیا ءَ گوں تران کنان ءَ کت اَنت کہ آئی ءِ مات ءِ بیرانی ءِ سر ءَ قومی اسمبلی ءِ باسک ءُ پیپلز پارٹی ءِ چیف وپ میر اعجاز حسین جکھرانی ءِ بیرانی ءِ سر ءَ دلپدردی درشان کنان ءَ کت اَنت۔ بلوچستان ءِ سر وزیر ءَ گشتگ کہ بلوچستان ءَ ناشرکاری ءِ ھلاپ ءَ جنگ بوھگ ءَ انت ۔ ناشرکارانی ہچ وڑیں قوم ءُ قبیلہ نیست، آ ایوک ءَ ناشرکار اَنت۔ پیپلز پارٹی ہر جیڑہ ءَ گوں گپ ءُ تران ءَ گیش ءُ گیوار کنگ ءِ سرا ایمان داریت ۔ اگاں گپ ءُ تران ءِ وسیلہ ءَ بلوچستان ءِ جیڑہ ءِ گیش ءُ گیوار دیم ءَ اتک گڑا ایشی ءَ چہ وشتر چے بوت کنت؟ بلے افسوس ایش انت کہ بلوچستان ءِ جیڑہ ءِ سرا گپ جنگ ءِ بدل ءَ گوں تپنگ ءَ گپ کنگ ءَ انت۔ اگاں بندوقانی وسیلہ ءَ گپ بہ جن انت گڑا ہمے پسو ءَ رسیت۔ آئی ءَ گوشت کہ ما بلوچستان ءِ ورنا آناں دیمروئی ءِ موہ آنی پجاری کنگ ءَ آں، آھاں یونیورسٹی ءُ کالج آنی تہ ءَ دیم دیگ ءَ آں ءُ وانگ ءُ زانگ ءِ نیمگ ءَ دلگوش کنگ ءَ آں۔ بلوچستان ءَ شہید محترمہ بے نظیر بھٹو اسکالرشپ ءِ جار جنگ بوتگ کہ ایشی ءِ وسیلہ ءَ ما دنیا ءِ جوانیں یونیورسٹیانی تہا آکسفورڈ ءُ ہارورڈ ءَ ہوار یونیورسٹیانی دروازگاں پہ بلوچستان ءِ ورناہاں پچ کنگ ءَ ایں ۔ دومی نیمگ ءَ بلوچستان ءِ ورناھاں ناشرکاریں وتکُش تراک کنوک جوڑ کنگ ءَ اَنت۔ اے گپ چہ مئے ءُ آھانی میان ءَ فرق ءَ پدّر اِنت۔ بیگواھیں مردمانی بابت ءَ جست ءِ پسو ءَ بنجاھی وزیر ءَ گوشت کہ ما بلوچستان اسمبلی ءَ اے جیڈھ ءِ سر ءَ ھاسیں کانود جوڑ کتگ تانکہ آیوکیں وھد ءَ اے وڑیں الزام ریاست یا ریاستی ادارگ آنی سر ءَ ایر کنگ مہ بنت ءُ الزام آنی راہ پہ دائمی بند کنگ بہ بیت۔ آئی ءَ گوشت کہ ایران مئے برات اسلامی ملک انت۔ کلیں راج ایران ءِ گوما اوشتاتگ انت۔ الس ءِ جان ءُ مال ءِ ایمنی ءَ را دل یکیمی کنگ مئے سرا پرز انت۔ مئے جہد ہمیش انت کہ بلوچستان ءَ جاور شر بہ بنت ۔
