اسلام آباد۔22جون (اے پی پی):مزن وزیر محمد شہباز شریف ءَ ایران ءِ صدر مسعود پیزیشکیان ءَ گوں ٹیلی فون کتگ ءُ ایران ءِ سر ءَ امریکا ءِ اُرش مذمت کتگ ءُ گشتگ کہ امریکا ءِ اُرش آئی اے ای اے ءِ کانود ءُ دگہ میاں اوستمانی کانود ءِ مزنیں ھلاپ ورزی انت۔ مزن وزیر کارگس ءِ میڈیا ونگ ءِ نیمگ ءَ چہ جاڑی بوتگیں پریس ریلیز ءِ رد ءَ مزن وزیر ءَ یک شمبے ءِ روچ ءَ شپ ءَ ایران ءِ صدر ءَ را ٹیلی فون کتگ ءُ پاکستان ءِ سر ءَ امریکی اُرش آنی مذمت کتگ کہ گوستگیں ھشت روچ آنی تہ ءَ اسرائیل ءِ بے سوب ءُ بے جاہیں زوراکی ءَ پد بوتگ۔ آئی ءَ براتیں ایران ءِ الس ءُ حکومت ءِ گوما پاکستان ءِ بے دروریں یکوئی ءِ پدرائی کت، گران بھائیں جانی بیرانی ءِ سر ءَ دلپدردی ءِ درشانی کت ءُ ٹپیگ آنی زوت جان سلامتی ءِ دعا کت۔ مزن وزیر ءَ اے گپ ءِ سر ءَ تحفظات ءِ درشان کت کہ امریکی اُرش آنی تہ ءَ ھما آسراتی آناں نشانگ جوڑ کنگ بوتگ کہ آ میاں اوستمانی ایٹمی توانائی ایجنسی ءِ نگرانی ءَ بوتگ اَنت۔ اے اُرش آئی اے ای اے ءِ آئین ءُ دگہ میان اُستمانی کانودانی مزنیں ھلاپ ورزی اِنت۔ اقوام متحدہ ءِ منشور ءِ آرٹیکل 51 ءِ رد ءَ ایران ءِ وت دفاع ءِ حق ءِ حوالہ ءَ مزن وزیر ءَ امن ءِ واستہ ترندیں گپ ءُ تران ءُ سفارتکاری ءِ ضلورت ءِ سر ءَ زور پر دات کہ دیمروئی ءِ یکیں زندگ داروکیں راہ اِنت۔ مزن وزیر ءَ کشیدگی آناں کم کنگ ءِ واستہ ترندیں یکجائی کوشست آنی ھم لوٹ کت ءُ اے درگت ءَ جوڑیشت ءِ کرد پیلو کنگ ءِ واستہ پاکستان ءِ عزم ءِ سر ءَ پدا زور دات۔ صدر پیزشکیان ءَ ایران ءِ واستہ پاکستان ءِ کمک ءِ توسیپ کتگ۔ آئی ءَ ایران ءِ الس ءُ حکومت ءِ گوما یکوئی ءِ درشان کنگ ءِ پد ءَ مزن وزیر ، حکومت ءُ پاکستان ءِ الس ءَ ھوار فوجی سروکی ءَ را دل ءِ جہلانکی ءَ چہ منت واری ءِ درشان کت ۔ دوئیں رہشوناں اے نازرکیں موڑ ءَ امت ءِ نیام ءَ یکوئی ءِ ضلورت ءِ سر ءَ زور پر دات۔ دوئیں رہشوناں نزیکیں رابطہ ءِ سرا تپاک کتگ۔
