جنیوا۔ 14 ستمبر (اے پی پی) پاکستان اقوام متحدہ نا انسانی حق کونسل آ زور شاغانے کہ او بھارت نا غیرکانودی کوزہ گیری ٹی جموں وکشمیر اٹی کشمیری الس نا بنداوی حق و آجوئی ءِ سلب کننگ کن بھارت نا براہ راست ریاستی جور ءِ سگپ بلکن بھارتی ڈوہ ءِ توننگ اٹ کڑد ادا کے۔ جنیوا ٹی اقوام متحدہ دفتراٹی پاکستان نا آخبتی نمائندہ سفیر خلیل ہاشمی 47 باسکی انسانی حق کونسل نا دیوان اٹی شرہ ٹی پارے کہ غٹ آن بھلا جمہوریت نا دعویٰ کروک آ ملک بھارت نا ڈوہ شدت اختیار کرسا کننگ ءِ ہراڑآ انسانی حق کونسل نا گڑاس باسک آتا خوفناک چپی نا رداٹ اودے استثنانااحساس تننگ انگ ءِ۔ اوپاکستان نا دا خواست ءِ ولدا پارے کہ انسانی حق کونسل نا باسک آک بھارت آ جموں و کشمیر اٹی تینا غیرکانودی گام گیج آتے پدی ہلنگ ، آبادیاتی بدلی، انسانی حق انا خلاف ورزی تے توننگ و آزاد مبصر آتا جموں و کشمیر نا علاقہ اسکان رسینگ نا موکل تننگ کن زور شاغر۔ اوزور شاغا کہ جموں و کشمیر نا حالیت آتیا اقوام متحدہ نا انسانی حق انا دفتر، اوایچ سی ایچ آر آن اپ ڈیٹ ءِ جاری کننگے۔
