اسلام آباد۔ 09 ستمبر (اے پی پی) اقوام متحدہ نا سیکرٹری جنرل انتونیوگوتریس پارینے کہ جہانی برادری نوکاپ نا زہمی تا کمک کن پاکستان تون پبی کمک کے۔ او جمعہ نادے آ نیشنل فلڈ رسپانس کوآرڈنیشن سینٹر نا دورہ نا وخت آ گپ وتران کریکہ۔ داوخت آ وزیراعظم محمد شہباز شریف ، بنجائی وزیر ڈٹ بندی و شونداری احسن اقبال ، بنجائی وزیر خزانہ مفتاح اسماعیل و ایلوفک ہم ساڑی ئسر۔ سیکرٹری جنرل پارے کہ پاکستان ہمو ملک آتیٹی اوار ءِ ہرافتے چاگڑدی بدلی مون تروک ءِ۔ ساڑی آ نوکاپ و قدرتی آفت آن پد این ایف آر سی سی ، حکومتی ادارہ و این اجی اوک پبی وڑاٹ زہمی تا کمک کن کاریم کرینو۔ اوپارے کہ دا مشکل حالیت آتیٹی جہانی برادری پاکستان تون کمک کے و نوکاپ زہمی تیکن تینا کڑد ءِ ادا کے۔ اوپارے کہ پاکستان تون کنا بھلو رشتہ اسے ، دا کنا است آن خڑک ءِ۔ پاکستان اوغان پناہ گزین تا مہمانداری ءِ کرینے۔ دہشت گردی نا سوب آن پاکستان ءِ بھاز نسخان تتون مون تروئی تما و اونا الس بھاز مشکل کاٹانے۔ اوپارے کہ او جہانی برادری ءِ دا مشکل حالیت آتیٹی پاکستان نا کمک کن متحرک کیک۔ وزیراعظم شہباز شریف سیکرٹری جنرل ءِ پارے کہ ساڑی آ نوکاپ آن پد بنجائی و صوبائی حکومت بشمول پاکستان نا سلہہ بند فوج زہمی تے ہرممکن کمک فراوان کریر، اوفتے رکھوک ہند آتیا گدریفیر و خور و پناہ تسر۔ نوکاپ آن پاکستان اٹی بھلو کچ اسے آ بھسکاری مسنے۔ ننا مون آ بھاز بھلو چیلنج اسے۔ دا مشکل حالیت آتیٹی کمک کروک آ چندی ملک آک و ادارہ غاتا منت واری ءِ ہرفنہ۔ اواقوام متحدہ نا سیکرٹری جنرل نا دورہ پاکستان آ منت واری ءِ ہرفے۔ سیکرٹری جنرل ءِ داوخت آ پاکستان اٹی نوکاپ آن مروک آ بھسکاری و حکومت نا کنڈآن زہمی تا کمک کن کروک آ گام گیج آتابارواٹی حوال تننگا۔
