جنیوا۔ 02 ستمبر (اے پی پی) ورلڈ ہیلتھ آرگنائزیشن (ڈبلیو ایچ او ) پارینے کہ جہانی کوویڈ۔ 19 کیس آتا کچ 600 ملین آن گدرینگانے۔ چینی خبررساں ادارہ ڈبلیو ایچ او نا جاری کروک تازہ انگا حساب وکتاب نا بابت پارینے کہ مچ آ دنیا ٹی کوویڈ۔ 19 نا کیس آتا کچ 600 ملین آن گدرینگانے۔ ڈبلیو ایچ او حوال تس کہ جہانی کہول آ 600،555،262 پک مروک کوویڈ کیس ءُ، ہرافتا جم وڑاٹ 6،472،914 بندغ آتا مرک ہم اوار ءِ۔ حوال اٹی پاننگاکہ امریکہ ٹی پک مروک کیس و مرک آتا غٹ آن زیات کچ ءِ، ہراٹی 93.21ملین آن زیات کیس و 1.03ملین آن زیات مرک آک ءُ۔ ڈبلیو ایچ او نا علاقائی دفترآتا رداٹ ، یورپ و امریکہ ٹی داتم اسکان بالترتیب 248 ملین و 175 ملین آن زیات پک مروک کیس آتون اوار اوار 2،077،355 و 2،817،530 مرک رپورٹ مسنے۔ ہڑتوم آ ڈیہہ تیٹی دنیا نا کل پک مروک کیس آتا 70 درسد و 75 درسد آن زیات مرک آک ءُ۔ دُن تو پوسکن آ کوویڈ کیس و مرک آتا کچ اٹی پدریسہ کمتی بننگ ءِ۔ ڈبلیو ایچ او غٹ پدتموک ملک آتیان خواست کرینے کہ او دا مخلوق ءِ ویکسین کیر ہراغٹ آن زیات خطرہ ٹی ءُ و دین انا جانچ و ترتیب ءِ برجاتخسا مخلوق ءِ ویکسین اسکان رسینگ ءِ پک کیر۔
