اقوام متحدہ۔ 30 اگست (اے پی پی) پاکستان زور شاغانے کہ جہانی برادری اوغانستان ءِ تنیا کننگ نا جاگہ غا انسانی حق انا شرف، سیاسی اواری و انسداد دہشت گردی نا بابت تینا ہدف آتا دوئی کننگ کن اوغان حکومت تون آخبتی رابطہ غاتے مون آ دے۔ اقوام متحدہ ٹی پاکستان نا آخبتی مندوب منیر اکرم سلامتی کونسل اٹی اوغانستان نا عبوری حکومت نا 13 راہشون تا سفری پابندی تیان استثنیٰ نا پوسکنی آ 15 باسکی باڈی نا باسک آتیٹی امنائی مفننگ نا حوالہ ءِ ترسا پارے کہ اوغان حکومت ءِ تنیا کننگ آن اونا پالیسی تیٹی ہچ ءُ بدلی اس بفک۔ اوپارے کہ اوغانستان نا عبوری حکومت ءِ تنیا کننگ نئے بیرہ اوغان الس بلکن جہانی برادری نا فائدہ ٹی اف۔ اوپارے کہ اوغان حکومت نا 13 راہشون تیکن سفری پابندی آن استثنیٰ نا پوسکنی آ سلامتی کونسل نا باسک آتیٹی اختلاف فریشانی اسے۔ اوخبڑدار کرے کہ بھلا واکدار آتا نیام اٹ اوغانستان نا بابت جغرافیائی سیاسی اختلاف نئے بیرہ جنگ آن زہمی دا ملک بلکن مچ آڈیہہ آ سنگین اثر شاغک۔ پاکستانی مندوب منیر اکرم پارے کہ واک انا کمک اٹ ہچ ءُ گڑاسے دوئی کننگ مفک چائے او پابندی مرے، منجمد میرات مرے یا سفری پابندی مرے۔ اوپارے کہ بلاشبہ چندی ملک آتا کنڈآن مسن و زالبول آتا تعلیم، انسانی حق، اواری و انسداد دہشت گردی نا بارواٹی اوغان حکومت نا کنڈآن کروک آ قول آتے زوت پورو کپننگ آ گڑتی سفت نا قابل ءِ ولے کابل سرکڑدہ ءِ تنیا کننگ آن اودے تینا پالیسی تیٹی بدلی اتنگ آآمادہ کننگ مفک۔ پاکستانی سفیر منیر اکرم پارے کہ جہانی برادری نا بنداوی است خواہی اوغانستان اٹی پائیدار امن و سلامتی نا بحالی ءِ تانکہ اسہ پین خانہ جنگی سے آن بچنگ مرے۔ اوپارے کہ اوغانستان کن انسانی و اقتصادی کمک ءِ برجاتخنگ ہم بھاز المی ءِ۔
