بیجنگ۔ 23 اگست (اے پی پی) چین اٹی پاکستان نا سفیر معین الحق پارینے کہ تدریسی سرجزآتا بحالی کن چینی یونیورسٹی تیٹی خوانوک آ پاکستانی طالب علم آتا ارٹ میکو بیج زوت چین آ پدی کاہک ۔ اوپاکستانی کمیونٹی و طالب علم آتون گپ وتران کرسا پارے کہ نن کورونا دین انا سوب آن پدی ہنوک آ پاکستانی طالب علم آتا ارٹ میکو فیز انا پدی ہِننگ کن کاریم کننگ اُن، و اوفتا زوت چینی یونیورسٹی تیٹی پدی ہِننگ کن پبی کوشست کننگ اُن۔ اوپارے کہ پاکستانی حکومت و چینی کمامدارآتون اواری اٹ اولیکو فیز اٹی 250 طالب علم آتے چین آ پدی گدریفنگ نا بست وبند کرے۔ اوپارے کہ چین نا یونیورسٹی تیٹی خوانوک آ کم و ود 100 پاکستانی طالب علم ہرا کورونا دین انا سوب آن پاکستان اٹ سلیسوسر، نا اولیکو بیچ 20 جون آ چین آ پدی سرمسنے و او قرنطینہ نا المی مد ءِ پورو کننگ آن پد تینا تعلقدار ادارہ گاتیٹی سرمرسا خوان نا سرجزآتا بناءِ کرینو۔ چین اٹی پاکستانی سفارت خانہ پاکستانی طالب علم آتا واپسی کن چینی کمامدارآتون بھلو رابطہ اس برجاءِ۔ سرکاری حوالی نا رداٹ چینی یونیورسٹی تیٹی زیر تعلیم 6 ہزار پاکستانی طالب علم تینا تعلیم ءِ برجاتخنگ نا خواہندار ءُ۔ یات سلے کہ پاکستان نا وزیراعظم شہباز شریف تینا چینی ہم منصب لی کی چیانگ تون ٹیل فون آ گپ وتران اٹی پاکستانی طالب علم آتا باندات آ گپ وتران کرے ہرا چینی یونیورسٹی تیٹی تعلیم دوئی کننگ نا خواہندار ءُ۔ چینی وزیراعظم باور کرفے کہ چین دا باندات ءِ اولیت ایتک و ہڑتوم آ ملک آتا وزیراعظم آک چین اٹی پاکستانی طالب علم آتا ریسہ وار پدی ہِننگ آ امنا کریر۔
