دوحہ۔ 04 اگست (اے پی پی) امارات اسلامیہ اوغانستان پارینے کہ اوغان حکومت القاعدہ نا راہشون ایمن الظواہری نا مرک انا امریکی دعویٰ نا جاست وپاست ءِ کننگ ءِ، ہراٹی او اسہ ڈرون جلہو اسے ٹی القاعدہ نا راہشون ایمن الظواہری نا کرک انا دعویٰ ءِ کرینے۔ برطانوی خبررساں ادارہ نا ردات اقوام متحدہ ٹی طالبان نا پندار نمائندہ سہیل شاہین ہرا دوحہ ٹی رہینگ انگ ءِ پارینے کہ اوغان حکومت و سرکڑدہ غاک داہیت آن معلومدار الورہ ہرا نا دعویٰ ءِ کننگانے و نئے داوڑءُ شاہدی اس مون آ بسنے۔ اوپارے کہ حکومت دا دعویٰ نا جاست وپاست ءِ کننگ ءِ تانکہ معلوم مننگ کے داٹی اخس سچائی ءِ و اسل راستکی تے مون آ اتنگک۔ سہیل شاہین پارے کہ اوغان حکومت دوحہ معاہدہ غا سلوک ءِ۔ یات سلے کہ تدوک آ یک شنبے آ امریکی ڈرون جلہو نا بارواٹی طالبان راہشون بھلو حداسسکان خاموشی اختیار کرینے و او داسکان کابل اٹی الظواہری نا ساڑی گری یا مرک ءِ پک کتنے۔ مصر آن تعلق تخوک آ الظواہری ، 11 ستمبر 2001 آ امریکہ غا جلہو آتیٹی خڑکی اوار مننگ و دنیا نا غٹ آن زیات درکار دہشت گردآتیان اسٹ ئسک۔
