اقوام متحدہ۔ 29 جولائی (اے پی پی) اقوام متحدہ نیامی ایشیا ءِ امن ، پت و کمکاری نا ڈیہہ گوندا و دا چرجوئی ٹی اقوام متحدہ نا جنرل اسمبلی قرارداد نا منظوری ءِ تسنے۔ پاکستان اودے اسہ وخت آ گام اس گوندانے۔ اقوام متحدہ نا 193 باسکی جنرل اسمبلی داہیت انا سفارش کرے کہ ڈیہہ نا غٹ ریاست آک و ایلو غٹ ملک آک نیامی ایشیاٹی امن ءِ برقرار تخنگ کن کمک کیر و اقوام متحدہ نا چارٹر نا سختی اٹ پابندی ءِ کرسا ڈیہہ نا غٹ ریاست آتا قومی یکجہتی، وتواجہی، سیاسی آجوئی و علاقائی سالمیت نا شر فءِ کیر۔ ترکمانستان نا سفیر اخوسلطان عطائیوا کرغزستان ، تاجکستان و ازبکستان نا کنڈآن قرارداد درستی راستی کرفسا پارے کہ داسہ وخت بسنے کہ دا اصول و قدر آتے پیدوار وڑاٹ بیان کننگے ہرا نیامی ایشیائی ملک آتا جاچ مفادات آتا بنداو آ امن و سلامتی ، داڈیہہ ٹی پائیدار شونداری، کمکاری و دودوربیدگی تعلقداری تے مون آ دننگ اٹ کمک کیک۔ نیامی ایشیائی نا ملک آتیٹی کمکاری و شونداری نا بے پناہ لائخی تخوک ءِ، دا ڈیہہ نا نئے بیرہ اسیجائی روحانی، دودوربیدگی و تاریخی میرات ءِ بلکن اوفتا اسہ ایلو ٹی اسہ دسورے اسے تون ات و در و مواصلاتی نیٹ ورکس ہم ارے ہرا اسے ایلو ءِ پورو کیرہ۔ اقوام متحدہ ٹی پاکستان نا سفیر منیر اکرم قرارداد نا پورو مخ تفی نا درشانی ءِ کرسا اودے وخت آ گام اس گوندا۔ اوپارے کہ پاکستان داوخت آ قرارداد و اونا مسخت آتا پورو مخ تفی ءِ کیک ہرانا مسخت جہانی امن و سلامتی ءِ سوگو کننگ، اقوام متحدہ نا چارٹر و اصول آتے مون آ دننگ، کثیر الجہتی نا مون آ دننگ، تین پہ تینی افہام و تفہیم و کمکاری ءِ ودفنگ ءِ ہرا نیامی ایشیا و مچ آ دنیا ٹی اقتصادی شونداری، علاقائی امن، شونہالی و رابطہ غاتا مون آ دننگ کن بھا زالمی ءِ۔
