اسلام آباد۔ 28 جولائی (اے پی پی) قطراٹی کاریم کروک آ پاکستانی تا زرراہی تس اٹی تدوک آ مالی سال اٹی 12.9 درسد نا نمو ریکارڈ کننگانے۔ اسٹیٹ بینک انا کنڈآن دا بابت جاری کروک حساب وکتاب نا رداٹ مالی سال 2022اٹی قطر اٹی کاریم کروک آ پاکستانیک 1.028 ارب ڈالر نا زرمبادلہ ملک آ گدریفیر ہرامالی سال 2021نا مقابلہ ٹی 12.9 درسد زیات ءُ، مالی سال 2021 اٹی قطر آن زرراہی تس نا کچ 910.7 ملین ڈالر ریکارڈ کننگاسس، جون اٹی قطر آن 93.6ملین ڈالر نا زرراہی تس ریکارڈ کننگا ہرا مئی ٹی 76.6 ملین ڈالر و تدوک آ سال جون اٹی 83.3 ملین ڈالر ئسر۔ اسٹیٹ بینک انا کنڈآن کانودی و بینکنگ ذریعہ اٹ زرراہی تس نا است بڈی کن گام گیج و آسراتی تا نتیجہ ٹی سمندر آن ایپار پاکستانی تا زرراہی تس اٹی پدریسہ ودکی مننگ ءِ، تدوک آ مالی سال اٹی سمندر آن ایپار پاکستانی تا زرراہی تس اٹی سالانہ بنداو تیا 6.1 درسد نا نمو ریکارڈ کننگانے۔
