جنیوا۔ 28 جولائی (اے پی پی) جہانی ادارہ جان جوڑی (ڈبلیو ایچ او ) پارینے کہ یورپ و امریکہ منکی پاکس آن غٹ آن زیات زہمی مروک آ ملک آک ءُ۔ چینی میڈیا نا رداٹ ڈبلیو ایچ او نا ڈائریکٹر جنرل ٹیڈروس ایڈہینوم گیبریئس پارے کہ 78 ملک آتیان منکی پاکس نا 18 ہزار آن زیات کیس رپورٹ مسنے ہرافتیان 70 درسد نا تعلق یورپ و 25 درسد امریکہ غان ءِ۔ او سوشل میڈیا پلیٹ فارم، ٹیک کمپنی و نیوز آرگنائزیشن تیان خواست کرینے کہ او منکی پاکس انا بارواٹ غلط معلومداری تے توننگ و اوفتا مقابلہ ءِ کننگ کن ننتون کاریم کیر۔ ڈبلیو ایچ او زور شاغسا پارینے کہ غٹ ملک آک منکی پاکس انا تالانی و گدریفنگ ءِ توننگ و نزور قوت مدافعت والا بندغ آتیکن المی گام گیج کرسا منکی پاکس ءِ سنجیدگی اٹ ہلیر۔ داکان بیدس کینیڈا، یورپی یونین و امریکہ منکی پاکس نا برخلاف ایم وی اے۔بی این(موڈیفائیڈ ویکسینیاانقرہ۔باویرین نورڈک) پنی آ ویکسین ءِ کاریم اٹ اتنگ کن مہالو آن منظوری تسنو و پین 2 ویکسین تا جاچ ءِ ہلنگ انگ ءِ، ولے ویکسین نا تاثیر و خور انا حساب وکتاب نا کمتی نا سوب آن ڈبلیو ایچ او فی الحال منکی پاکس نا برخلاف بھلو کچ اسے آ ویکسی نیشن نا سفارش کپننگ ءِ۔ یات سلے کہ جہانی ادارہ جان جوڑی تدوک آہفتہ منکی پاکس ءِ باضابطہ وڑاٹ جہانی گڑتی نا جان جوڑی نا ایمرجنسی (پی ایچ ای آئی سی) گوندا۔ پی ایچ ای آئی سی غٹ آن بڑزکو کہول انا الرٹ ءِ ہرااقوام متحدہ نا جان جوڑی نا ادارہ تننگ کیک۔
