اقوام متحدہ۔ 27 جولائی (اے پی پی) پاکستان اقوام متحدہ نا سلامتی کونسل آن خواست کرینے کہ او دے ٹک نیامی ٹی امن و سوگوی کن اولیتی وڑاٹ اسرائیلی کوزہ نا چٹفنگ و مریس ایسر نا چاری فلسطین نا جھیڑہ ءِ گچین وڑاٹ ایسر کے۔ اقوام متحدہ ٹی پاکستان نا آخبتی مندوب منیر اکرم دے ٹک نیامی نا حالیت آتیا اڈ ہلوک 15 باسکی سلامتی کونسل نا دیوان اٹی شرہ ٹی پارے کہ مقبوضہ فلسطین اٹی اسرائیلی کوزہ و جارحیت مچ آ دے ٹک نیامی ٹی نزوری، بے چیٹی و جھیڑہ نا بنداوی سوب ءِ۔ اوپارے کہ سلامتی کونسل مقبوضہ فلسطین اٹی اقوام متحدہ نا چارٹر و جہانی کانود نا اصول آتیا عملدرآمد کرفنگ و امناکروک اِراریاستی ایسر ءِ مون آ دننگ نا عمل ءِ بحال کننگ اٹی بے سہب مسنے و نئے او انسانی حق، جہانی کانود و کونسل نا تینا قراردادآتا اسرائیلی خلاف ورزی تا مذمت ءِ کرینے۔ اوپارے کہ اگہ فلسطین آ اسرئیلی کوزہ برقرار مس تو فلسطین اٹی امن قائم مفک۔ اوپارے کہ اسرائیلی ظلم و جارحیت فلسطینی تا ہر بروک آ چین نا تینا حق خودارادیت نا دوئی کننگ، آجوئی و بنداوی حق انا دوئی کننگ نا جہد ءِ نزور کننگ کپک۔ پاکستانی مندوب منیر اکرم پارے کہ دوریاستی ایسری نا رداٹ 197 آن مست انا سیم تیا تالان فلسطینی ریاست نا جوڑ کننگ ہرانا دارالحکومت بیت المقدس مرے، داجھیڑہ نا اسٹ انگا ایسر ءِ۔ اوپارے کہ پاکستان ءِ مقبوضہ بیت المقدس نا بگڑینگوک آ حالیت آتیا گڑتی ءِ و او اسرائیل نا کنڈآن فلسطینی شاری تے پدریسہ کسفنگ، اوفتے ٹھپی کننگ، فلسطینی تا اُراتے نسخان تننگ و صحافی شیریں ابو عاقلہ نا خون نا مذمت ءِ کیک۔ دا چرجوئی ٹی اوکونسل ءِ تدوک آ مارچ اٹی او آئی سی نا وزراء خارجہ نا دیوان اٹی منظور کروک آ’’اسلام آباد اعلامیہ‘‘ نا اہم ٹک و ایلو گڑاتیان معلومدار کرے۔
