جہانی برادری پدتموک آ ملک آتیٹی خور انا پیدوار ءِ ودفنگ، سپلائی چین ءِ ملوک تخنگ، نیزگار بزغرآتا کمک و فوڈ بینک جوڑ کننگ کن ہلہلہ ئی لائحہ عمل اس مون آ اتے، احسن اقبال

نیویارک۔ 14 جولائی (اے پی پی) پاکستان جہانی برادری آ زور شاغانے کہ پدتموک آ ملک آتیٹی خور انا پیدوار ءِ ودفنگ ، سپلائی چین ءِ ملوک تخنگ، نیزگار بزغر آتا کمک و فوڈ بینک جوڑ کننگ کن ہلہلہ ئی لائحہ عمل اس مون آ اتنگے۔ پاکستان جہانی برادری آن دا ویل آتون مون تننگ کن مالی وسیلہ غاتے متحرک کننگ نا ہم خواست کرے۔ داڑے اقوام متحدہ ٹی اسہ پریس کانفرنس اسے آن تران کرسا ڈٹ بندی، شونداری و خصوصی گام گیج آتا وزیر احسن اقبال پارینے کہ پدتموک ملک آتا ٹولی جی۔ 77 نا صدر مننگ ناناطہ پاکستان داہیت آ زور شاغک کہ نیزگاری و بین انا مون ءِ توننگ کن پیچیدہ پنجر نا اصلاح کننگ و انتظامی ویل آتے ایسر کننگ نا گرج ءِ، و پاکستان سلا ہ کیک کہ سپلائی چین ءِ لگوک آ دِکہ نا اثرآتے کم کننگ کن پدتموک ملک آتے کمک فراوان کننگ کن اقوام متحدہ جہانی کوشست آتا کماشی ءِ کے۔ احسن اقبال ہرا داوخت آ اقوام متحدہ ٹی بڑزکو کہولی سیاسی فورم (ایچ ایل پی ایف) دیوان اٹی بشخ ہلنگ کن امریکہ نا دورہ ءِ کننگ ءِ، پارے کہ داپائیدار شونداری نا ہدف آتیا عمل کننگ نا جہانی کوشست آتا اسہ جزو اسے۔ اوپارے کہ دا جہانی کوشست ءِ تدوک آ منہ سال اٹی کوویڈ۔ 19، موسمیاتی بدلی وجھیڑہ غاتا سوب آن بھاز دھچکا لگانے۔ اوپارے کہ پاکستان پدتموک ملک آتا اجتماعی اقتصادی فائدہ غاتا مون آ دننگ کن اجتماعی کارروائی و ردعمل نا تیاری کن فعال کڑد ادا کننگ ءِ۔