یورپین کونسل ، یورپین کمیشن نا صدر آتا کاشنزو آبے آ مروک آ جلہو نا مذمت، است ہسونی نا درشان

برسلز۔ 08 جولائی (اے پی پی) یورپین کونسل نا صدر چارلس مچل و یورپین کمیشن نا صدر ارسلاوان ڈیرلیان ئسک جاپان نا مسکوہی وزیراعظم شنزو آبے آ مروک آ جلہو نا مذمت ءِ کرسا اونا زوال کننگ آ است ہسونی نا درشانی ءِ کرینو۔ فرانسیسی خبررساں ادارہ نا رداٹ یورپین کونسل نا صدر چارلس مچل جمعہ نادے آ اسہ ٹویٹ اسے ٹی پارے کہ جاپان نا مسکوہی وزیراعظم شنزو آبے اسہ سچا دوست، کثیر الجہتی نظم و جمہوری قدر انا حقی ءُ محافظ اس ئسک۔ اومسکوہی وزیراعظم نا خاہوت تون ہمدردی نا درشانی ءِ کرسا پارے کہ یورپی یونین دا مشکل ساہت اٹی جاپان نا الس و وزیراعظم فومیو کیشیدہ تون تفوک ءِ۔ داکان بیدس یورپین کمیشن نا صدر ارسلاوان ڈیرلیان ٹویٹر آ یورپی یونین و جاپانی بیرک آتا مون آ سلسا جوڑ کروک آ عکس اس شیئر کرے و مسکوہی وزیراعظم شنزو آبے نا خاہوت کن نیک است خواہی نا درشانی ءِ کرے۔ یات سلے کہ جاپان نا مسکوہی وزیراعظم شنزو آبے ءِ جمعہ نادے آ اسہ گچین کاری جلسہ سے ٹی نادرست ءُ بندغ اس پشٹول اٹ اِراسم خلک ہراڑآن او بھاز ٹھپی مسوسس، اودے نازرک حالیت اٹی ہسپتال آ دننگا ولے او دراخ جوڑ مننگ کتو۔