بالی۔ 08 جولائی (اے پی پی) چین نا وزیر خارجہ وانگ ای انڈو نیشیا نا جزیرہ بالی ٹی جی 20 وزراء خارجہ نا دیوان نا وخت آ تینا روسی ہم منصب سرگئی لاروف تون اوڑدہی کرے۔ چینی ریڈیو نا رداٹ وانگ ای پارے کہ ساڑی جہانی حالیت آتیان پد ہم چین و روس ہڑتوم آ مملکت آتا سروک آتا سٹریٹجک راہشونی ٹی ہڑدے ئی تبادلہ غاتے برقرار تخانو و چندی بشخ آتیٹی کمکاری ءِ سجفوک وڑاٹ مون آ درینو ہراڑآن ہڑتوم آ کنڈآتا تعلقداری تا سوگو لچک نا درشانی ءِ کننگانے۔ اوپارے کہ چین برکس سروکی دیوان اٹی روس انا فعال بشخ ہلنگ و جہانی شونداری ءِ مون آ دننگ کن تروک آ خذمت آتا ستاءِ کیک۔ نن سمٹ نا اہم نتیجہ غاتے نافذ کننگ، پائیدار شونداری نا 2030 ایجنڈا نا مون آ دننگ ءِ ترند کننگ، پدتموک ملک آتا مشترکہ مفادات نا رکھ و جہانی انصاف نا رکھ اکن روس اتون اوار غٹ فریق آتون اواری اٹ کاریم کننگ کن تیار ءِ۔ روسی وزیر خارجہ سرگئی لاروف چین ءِ برکس سروکی دیوان نا سرسہب اڈتننگ آ مبارکبادی تس و پارے کہ روس ہڑتوم آ ملک آتا الس ءِ گچین وڑاٹ فائدہ تننگ کن ہڑتوم آ کنڈآتا کمکاری تے ودفنگ خواہک۔ روس گلوبل ڈویلپمنٹ انیشیٹو و گلوبل سیکورٹی انیشیٹو تون اوار اہم تصور آتا مخ تفی ءِ کیک و چین اتون ہم گرنچی و کمکاری ءِ سوگو کیک۔
