کابل۔ 29 جون (اے پی پی) اوغانستان نا زمی جمب زہمی تیکن چینی حکومت نا کنڈآن کمکی گڑاتا ارٹ میکو کھیپ کابل بالی پٹ آ اوغان کمامدارآتا دوٹی تننگانے۔ چینی خبررساں ادارہ نا رداٹ اوغانستان نا عبوری حکومت نا ترجمان ذبیح اللہ مجاہد سوشل میڈیا کلہو اٹی پارے کہ چین نا 2 کارگو جہاز کمکی گڑاتا ارٹ میکو کھیپ ءِ ہرفسا کابل بالی پٹ آ سرمسر۔ یات سلے کہ اوغانستان اٹی 22 جون آ بروک آ بھسکار زمی جمب اٹی اسہ ہزار آن زیات بندغ زوال و کم و ود 2 ہزار ٹھپی مسنو وخت اس کہ ہزار آ اُراک بھس مسوسر۔ چین نا کنڈآن زمی جمب زہمی تیکن کمکی گڑاتا اولیکوکھیپ دوشنبے نا نن رسینگاسس ہرا اوغانستان کن چینی سفیر وانگ یو اوغان وزیر ڈیزاسٹر مینجمنٹ و ہیومینیٹیرین افیئرز غلام غوث نصیر نا حوالہ کرے۔ داوخت آ چینی سفیر پارے کہ بروک آ 3 دے اٹی پین 6 چینی جہاز کمکی گڑااتیرہ۔