اقوام متحدہ۔ 24 جون (اے پی پی) پاکستان خبڑدار کرینے کہ اوغانستان اٹی انسانی و زرگزرانی تنکی تون مون تننگ کن گام گیج کننگتو تو دانا بھلو کچ اسے آ انسانی مشکل، پین اوغان باہوٹ، تہہ نا جھیڑہ غاتا دُوارہ کاٹم ہرفنگ و داعش کون آ دہشت گرد ٹولی تا کنڈآن خطرہ غاتیٹی ودکی کون آ نتیجہ غاتون مون تروئی تمک۔ اقوام متحدہ ٹی پاکستان نا آخبتی مندوب منیر اکرم تدوک آ دے طالبان نا پالیسی تا جاچ ءِ ہلنگ کن اڈ ہلوک آ سلامتی کونسل نا دیوان اٹی پارے کہ نن اوغانستان نا ساڑی آ ہلہلہ خیز تاریخ نا اسہ پین موڑ اسے آ ٹی اُن، ننے تینا مسخت ءِ پیدوار کننگ نا گرج ءِ، و ننا بنداوی مسخت اوغانستان اٹی امن و سوگوی ءِ دوئی کننگ مرے ہراڑے چارشنبے نادے آ بروک آ زمی جمب بھسکاری کرینے۔ اوپارے کہ اسلامی کمکار تنظیم نا وزراء خارجہ نا چیئرمین نا حیثیت اٹ پاکستان اقوام متحدہ نا 15 باسکی سلامتی کونسل ءِ اسہ دستاویز اس گدریفینے ہراٹی امن نا کسر نا خاکہ ءِ پیش کننگانے ہرا او آئی سی نا تدوک آ 2 وزارتی کانفرنس آتیٹی کروک آ غور وفکر انا نتیجہ ءِ۔ او آئی سی نا باسک آک اوغانستان اٹی بحالی، پوسکن تفنگ، تعلیم، مالی و مادی امداد تون اوار آخبتی رابطہ غاتیا زور شاغا۔ پاکستانی مندوب داہیت انا درشانی ءِ کرے کہ اوغانستان نا تینا مالی وسیلہ غاتسکان رسینگ زرگزرانی بھسکاری ءِ توننگ کن اہم مریک۔ اوسلامتی کونسل آ زور شاغا کہ او دا ہیت ءِ پک کے کہ مبنی بر ہدف پابندی انسانی امداد یا زرگزرانی وسیلہ غاتا فراوانی ٹی اڑاند شاغپ۔ اوداہیت انا درشانی ءِ کرے کہ اوغانستان نا گل زمین ءِ دہشت گرد ٹولی تیکن رکھ ءُ جاگہ سے نا وڑاٹ بایدے کاریم اٹ اتنگپ، مسن تا تعلیم نا حق انا بابت تینا تدوک آبیان ءِ دُوارہ پارے و زالبول آتا حق آ اوغان حکومت تون گچین وڑاٹ ہیت و گپ اکن او آئی سی نا باسک ملک ، اسلامی اسکالر و ایلو فتا کڑد انا درشانی ءِ کرے۔
