ترکی اتون واپار، زرگزران ، توانائی، تون اوار چندی بشخ آتیٹی تعلقداری تے سوگو کننگ ناخواہندار اُن، وزیراعظم شہباز شریف

اسلام آباد۔ 31 مئی (اے پی پی) وزیراعظم شہباز شریف پارینے کہ پاکستان ترکی اتون واپار، زرگزران ، توانائی، بنداوی پنجر ، ای کامرس و آئی ٹی تون اوار چندی بشخ آتیٹی تعلقداری تے سوگو کننگ نا خواہندار ءِ، ہڑتوم آ ملک آتا ساڑی آ واپاری کچ حقی کچ اتون مطابقت تخپک، پاکستان اٹی پرکشش منافع تون زرکاری نا بھلو وارخواہی اس ارے، ترک کمپنی تا پاکستان اٹی زرکاری نا است بڈی ءِ کینہ، ہڑتوم آ ملک آک جموں و کشمیر و قطبی قبرص تون اوار بنداوی قومی فائدہ غاتا ڈٹ باندات آتیا اسہ ایلو نا مخ تفی ءِ کیرہ، پاکستان امریکہ تون مریس معیاد و گیشتر بنداو تعلقداری ءِ، امریکہ پاکستان کن بھلا برآمدی مارکیٹ و براہ راست درملکی زرکاری و زررادہ کننگ نا بھلا ذریعہ ءِ، سی پیک نا اسہ اہم وت پاکستان نا صنعتی شونداری ءِ۔ داخیال آتا درشانی ءِ او ترکی نا دورہ غا روانہ مننگ آن مست اناطولیہ نیوز ایجنسی ءِ خصوصی انٹرویوٹی کرے۔ وزیراعظم پارے کہ پاکستان و ترکی نا بے مٹ تعلقداری ءِ و دا تاریخی تعلقداری اسیجائی مذہب، دودوربیدگ، لثانی رابطہ غاتا سوگو بنداو تیا استوار ءِ و ہڑتوم آ ملک آک سیاسی بدلی تیان مبراءُ۔ اوپارے کہ ہڑتوم آ ملک آک اینخو سال سفارتی تعلقداری تا جوڑ مننگ نا 75 می سال دے ءِ اڈتننگ ءُ و دا تدوک آ ہفت ءُ نیم عشرہ غاتیٹی ہڑتوم آ ملک آک اسہ ایلو تون مدام تفینو۔ پاکستان و ترکی جموں و کشمیر و قطبی قبرص تون اوار بنداوی قومی فائدہ نا غٹ باندات آتیا اسہ ایلو نا مخ تفی ءِ کیرہ۔ وزیراعظم پارے کہ او جموں و کشمیر نا جھیڑہ غا ترکی و خاص وڑاٹ اونا سرکڑدہ غاتا اصولی مخ تفی آ منت واری ءِ ہرفک۔ پاکستان و ترکی نا علاقائی و جہانی باندات آتیا اسہ وڑنا خیالات ءُ و ہڑتوم آ کنڈآتا علاقائی و کثیر طرفہ فورم آ ہڑتوم آتا نیام اٹ خڑکی کمکاری ءِ۔ الس نا کہول آ دودوربیدگی رابطہ غاک مون آ ہِننگ ءُ۔ اوپارے کہ داسہ نن اقتصادی کمکاری آ چکار کرینن۔ ہڑتوم آ ملک آتا نیام اٹ واپار نا ساڑی آ کچ ننا گچین تعلقداری تا داتم اسکان سہی ڈیک ءِ تفک۔ دا چرجوئی ٹی ہڑتوم آ ملک آتیکن بھلو گمان اس ساڑی ءِ۔ وزیراعظم پارے کہ دورہ ٹی او ترکی نا پنی آ کاروباری کمپنی تا کمامدارآتون اوڑدہی کیک ہرانا مسخت پاکستان اٹی توانائی ، بنداوی پنجر، ای کامرس ، میونسپل کشاری انڈسٹری و آئی ٹی تون اوار چندی بشخ آتیٹی پاکستان اٹی مروک آ گیشتر وارخواہی تیان فائدہ ہرفنگ کن اوفتا است بڈی ءِ کننگ ءِ۔ اوپارے کہ 22 کروڑ آن زیات نا آبادی والا ملک پاکستان اٹی وسعت پذیر نیامی تپہ اتون زرکارآتیکن اسہ سوگو و بھلو صارف مارکیٹ اس ساڑی ءِ۔ پاکستان اٹی زرکار آتیکن پرکشش وارخواہی اتون زرکاری نا بھلو وارخواہی اسے۔ اسہ سوج اسے نا ورندی ٹی اوپارے کہ پاکستان و امریکہ نا نیام اٹ تین پہ تینی فائدہ غاتا چندی بشخ آتیٹی مریس معیاد و گیشتر بنداو تعلقداری ءِ۔ نن دا ہیت آ باور کینہ کہ ننا نیام اٹ پدریسہ تعمیری رابطہ غان علاقہ ٹی امن، سلامتی و شونداری ءِ مون آ دننگ مریک ۔ اوپارے کہ نن امریکہ تون تینا رابطہ سوگو وودفنگ خوانہ ہراکہ پاکستان کن بھلا برآمدی مارکیٹ و براہ راست درملکی زرکاری و زررادہ کننگ نا اسہ بھلو ذریعہ سے۔ ہڑتوم آ ملک آتا نیام اٹ واپار و زرکاری ءِ پین مون آ دننگ نا بھلو گنجائشت اس ساڑی ءِ۔ پاکستان موسمیاتی بدلی، جان جوڑی ، توانائی، واپار وزرکاری تون اوار چندی بشخ آتیٹی مذاکرات کرینے ہرا ہڑتوم آ کنڈآتا تعلقداری تے سوگو کننگ اٹ اہم کڑد ادا کننگ ءِ۔ امریکہ نا گڑاس کمپنی پاکستان اٹی بھاز جوان کاریم کننگ ءُ۔ نن پاکستان نا پرکشش مارکیٹ اٹی زرکاری کننگ وواپاری تعلقداری خاص وڑاٹ آئی ٹی نا بشخ انا شونداری کن بھلا امریکی کمپنی تا زرکاری نا است بڈی ءِ کینہ۔ اوپارے کہ اینخو سال پاکستان و امریکہ تینا سفارتی تعلقداری تا قیام نا 75 می سال دے ءِ اڈتننگ ءُ۔ سی پیک نا بابت اسہ سوج اسے نا ورندی ٹی وزیراعظم پارے کہ بیلٹ اینڈ روڈ انیشی ایٹو نا رداٹ رابطہ و کمکاری کنا حکومت نا اولیت و اسہ پرامن و شونہال ڈیہہ اسے کن پاکستان نا وژن نا عین رداٹ ءِ۔ پاکستان چین انا صدر شی جن پنگ نا وژن نا وڑاٹ بیلٹ اینڈ روڈ انیشی ایٹو نا عملی رابطہ، مالی کمکاری، واپار اٹی آسراتی، پالیسی سلابت و الس نا کہول آ رابطہ غاتا بی آر آئی نا 5 ٹک آتا پورو مخ تفی ءِ کیک۔ سی پیک بڑزکو آب انا شونداری نا اسہ پوسکن ءُ دور اسے ٹی پترینگ انگ ءِ و داڑآن بیلٹ اینڈ روڈ کمکاری نا کمک اٹ پاکستان ءِ صنعتی و اقتصادی وڑٹ پوسکن جوڑ کننگ نا عمل ترند مریک۔ اوپارے کہ دا اسیجائی مسخت نا سرسہبی کن داہیت انا گرج ءِ کہ پاکستان و چین سی پیک نا رداٹ بنداوی پنجر نا شونداری نا عمل ءِ برقرار تخر۔ اقتصادی سرجزآتیٹی ودکی اتون اوار اوار پدریسہ پالیسی، مخ تفی نا کمک اٹ کاروباری چاگڑد ءِ اواری اٹ بایدے گچین کننگے۔ نن ریلوائی ایم ایل ون آ پیش رفت کن چین اتون اواری اٹ کاریم کینہ۔ دا ڈٹ پاکستان نا کثیر الجہتی علاقائی رابطہ نا ماڈل وژن و گڑاس ایلو بھلا ڈٹ آتیکن تزویراتی اہمیت نا حامل ڈٹ ءِ۔ اوپارے کہ سی پیک نا رداٹ پاکستان اٹ سڑک و توانائی نا بنداوی پنجر اٹ چین نا زرکاری آن بجلی نا کاختی نا مون ءِ توننگ، پیدواری ہند آتے منڈی تتون ملفنگ اٹ کمک رسینگانے۔ ہزار آ ہندی بندغ آتیکن روزگار ناوارخواہی ودی مسنے و علاقائی رابطہ غاتے مون آ دننگانے۔ وزیراعظم پارے کہ سی پیک نا اسہ اہم وت پاکستان نا صنعتی شونداری ءِ ، سی پیک نا رداٹ خصوصی اقتصادی زون تیا کاریم برجاءِ۔ نن اہم صنعتی بشخ آتیٹی درملکی زرکاری کن آسودہی تننگ اُن۔ پاکستان ریلوائی نا بنداوی پنجر نا گچینی و گوادر پورٹ آن پورو فائدہ ہرفنگ تون اوار سی پیک نا بڑزکو آب انا شونداری نا دوئی کننگ کن سنبرینگوک ءِ۔