اسلام آباد۔ 31 مئی (اے پی پی) وزیراعظم شہباز شریف سے شنبےنادے آ مسہ دے ئی سرکاری دورہ غا ترکی آ روانہ مسنے۔ وزیراعظم آفس نا میڈیا ونگ آن جاری بیان نا رداٹ وزیر دفاع خواجہ محمد آصف، وزیر حوالکاری و شینکاری مریم اورنگزیب ، وزیر زرکاری بورڈ چوہدری سالک حسین، خصوصی کمکار طارق فاطمی و فہد حسین ئسک ہم وزیراعظم تون اوار ءُ، وزارت عظمیٰ نا منصب ءِ سنبھالنگ آن پد وزیراعظم شہباز شریف نا ترکی نا دا اولیکو دورہ ءِ۔ وزیر خارجہ بلاول بھٹو زرداری ہم ترکی آ سرمریک۔ (31مئی آن 2 جون 2022) اٹی وزیراعظم شہباز شریف نا صدر رجب طیب اردوان تون بالمشافہ (ون آن ون) اوڑدہی مریک اوکان پد ڈل آتا کہول آ گپ وتران اس اڈہلیک۔ پاکستان و ترکی نا نیام اٹ ہڑتوم آ کنڈآتا تعلقداری نا غٹ پلو آتا جاچ ءِ ہلنگ آن بیدس ہڑتوم آ راہشونک علاقائی و جہانی امور آ گپ وتران کیرہ۔ ہڑتوم آ راہشونک دیوان آن پد میڈیا غان اسیجائی تران ہم کیرہ۔ صدر اردوان وزیراعظم نا شرف اٹی سوارہ اس ہم ایتک۔ اینخو سال پاکستان وترکی نا نیام اٹ سفارتی تعلقداری نا قیام نا 75 می سال دے ءِ ہم اڈتننگ انگ ءِ۔ دورہ ٹی صدر اردوان و وزیراعظم شہباز شریف اسیجائی وڑاٹ یات گاری نشان ہم جاری کیرہ ہرا ترکی وپاکستان نا نیام اٹ ہڑتوم آ کنڈآتا مریس تاریخ اٹی دا اہم مزل نا نشان نا رداٹ تیار کننگانے۔ ترکی نا خارجہ امور، واپار وجان جوڑی نا وزیر آک ہم دورہ ٹی وزیراعظم تون اوڑدہی کیرہ۔
