اسلام آباد۔ 31 مئی (اے پی پی) بنجائی کابینہ تحریک انصاف نا چیئرمین عمران خان نا خونی لانگ مارچ و ریاست و بنجائی دارالحکومت آ جلہو گیر مننگ نا بابت وزیراعلیٰ خیبرپختونخوا نا بیان تا سخت نوٹس ءِ ہلسا اوفتیا گڑتی نادرشانی ءِ کرینے وخت اس کہ وزیرداخلہ رانا ثناء اللہ خان پارینے کہ ریاست مخالفت لانگ مارچ اس مس تو اوڑتون سختی اٹ مون تننگک۔ بنجائی کابینہ نا دیوان وزیراعظم شہباز شریف نا کماشی ٹی سے شنبے نادے آ اڈ ہلک۔ بنجائی کابینہ الس ءِ عمران خان نا 25 مئی نا لانگ مارچ ءِ مسترد کننگ آ مبارکبادی تس۔ دیوان اٹی پاننگاکہ میڈیا و وزارت حوالکاری نا الس کن سلہہ بند جتھ و ااونا اصل دروشم نا راستکی تیا مبنی رپورٹنگ ستاکڑزک۔ وزیراعظم کابینہ ءِ پارے کہ اووزارت داخلہ و کانود نافذ کروک آ ادارہ غاتے پارت کریسس کہ اسہ ہم کارندہ اسے تون سلہہ مف۔ وزیر داخلہ رانا ثناءاللہ دیوان ءِ پارے کہ اسہ کارندہ سے تون ہم سلہہ الوکہ۔ بنجائی کابینہ کانود نافذ کروک آ غٹ کارندہ غاتے تینا فرض ءِ جوانی اٹ سرتننگ آ خراج تحسین پیش کرے۔ وزیراعظم بنجائی وزیر داخلہ رانا ثناء اللہ ، سلاہکار امور کشمیر و گلگت بلتستان قمر زمان کائرہ تون اوار پنچ باسکی کمیٹی اس جوڑ کرے۔ وزیر داخلہ دیوان ءِ باور کرفے کہ ریاست مخالف لانگ مارچ مس تو اوڑتون سختی اٹ مون تننگک۔ مولانا اسعد محمود لانگ مارچ ءِ مسترد کننگ آ قوم ءِ مبارکبادی تس و کانود نا حکمرانی ءِ پک کننگ نا خواست کرے۔ بنجائی کابینہ پاکستان تحریک انصاف نا چیئرمین عمران خان نا کنڈآن 25 مئی نا خونی مارچ انا پڑو و پٹی آئی آئی نا کارندہ غاتا کنڈآن سلہہ غاتون اسلام آباد آ جلہو نا سختی اٹ نوٹس ءِ ہلک و گڑتی نا درشانی ءِ کرے۔ وزیر داخلہ رانا ثناء اللہ لانگ مارچ ءِ مسترد کننگ آ الس و لانگ مارچ اٹی خذمت سرتننگ آ کانود نافذ کروک آ ادارہ غاتا کارندہ غاتا منت واری ءِ ہرفے۔ رانا ثناء اللہ کابینہ ءِ پارے کہ 25 مئی آ پی ٹی آئی نا کنڈآن لانگ مارچ ہچ ءُ سیاسی سرگرمی اس الوکہ بلکن ریاست مخالف سجفوک ءُ ڈٹ اس ئسک۔ خیبرپختونخوا حکومت نا وسیلہ غاتے کاریم اٹ اتسا پی ٹی آئی اسہ دے اس مست کے پی ہاؤس اٹی سلہہ بند جتھ آتے جمع کرے، گلگت بلتستان نا وزیراعلیٰ ہم پولیس آ جلہو کرے۔ رانا ثناء اللہ پارے کہ دا سیاسی سرگرمی اس آخا بلکن پیدوار وڑاٹ ریاست آ جلہو نا کوشست اس ئسک۔ بنجائی کابینہ وزیراعلیٰ خیبرپختونخواہ نا بیان نا ہم نوٹس ءِ ہلک و گڑتی نا درشانی ءِ کرے ہراٹی اوفک پاریر کہ دا وار نن پورو واکداری اتون ریاست و بنجائی دارالحکومت آ جلہو کینہ۔
