اسلام آباد۔ 20 مئی (اے پی پی) کینیڈا کن پاکستان نا پوسکن آ ہائی کمشنر ظہیر اسلم جنجوعہ تینا سفارتی زمواری تے سنبھالانے۔ پاکستان ہائی کمیشن اٹاوانا کنڈآن جاری پریس ریلیز نا رداٹ پوسکن آ ہائی کمشنر تینا سفارتی زمواری تے باقاعدہ وڑاٹ سنبھالانے۔ ظہیر اسلم جنجوعہ کینیڈا ٹی سفارتی زمواری تے سنبھالنگ آن مست برسلز اٹی یورپین یونین، بیلجیئم و لکسمبرگ کن پاکستان نا سفیر نا وڑاٹ خذمت سرتسکہ۔ ظہیر اسلم جنجوعہ داکان مست وزارت خارجہ ٹی ایڈیشنل سیکرٹری یورپ نا حیثیت اٹ ہم خذمت سرتسنے۔ پیشن نا ملک سفارتی زمواری تا وڑاٹ او رشین فیڈریشن و ریپبلک آف بیلاروس اٹی ہم پاکستان نا سفیر رہینگانے۔ اٹاوا ٹی تینا پوسکن آ زمواری تے سنبھالنگ آن پد ظہیر اسلم جنجوعہ پاکستان وکینیڈا نا نیام اٹ تین پہ تینی تعلقداری تے سوگو کننگ نا عزم انا درشانی ءِ کرے۔ پوسکن آ سفیر کینیڈا ٹی رہینگوک آ پاکستانی و پاکستان نژاد کینیڈین تا خذمت ءِ تینا مشن گوندانے۔
