واشنگٹن۔ 27 اپریل (اے پی پی) امریکہ ٹی پاکستان نا سفیر مسعود خان پارینے کہ پاکستان حکومت ٹیکنالوجی نا صنعت کن سازگار چاگڑد اس ودی کننگ کن گام گیج کننگ ءِ و داوخت ٹیکنالوجی نا بشخ اٹی امریکہ و پاکستان نا نیام اٹ تعلقداری تے سوگو کننگ نا وخت ءِ۔ اوامریکی ریاست کیلی فورنیا نا شار سان فرانسسکو نا علاقہ سیلیکون ویلی ٹی ٹیک سمٹ 2022 آن تران کرسا پارے کہ امریکہ ننا کمک ءِ کننگ کن تیار ءِ و نن امریکی ٹیکنالوجی تیٹی جدت ءِ مربوط کرسا انفارمیشن ٹیکنالوجی انقلاب اٹ اوار مننگ کن تیار اُن۔ پاکستانی سفیر مسعود خان پارے کہ دا دیوان پاکستان نا کاروباری راہشون، ٹیک انٹرپرینیور ز و ٹیکنالوجی چاہندار آتے یکجا مرسا اسہ ایلو تون ہم گرنچی ودی کننگ کن اسہ پلیٹ فارم اس فراوان کیک تانکہ سیلیکون ویلی و پاکستانی اسٹارٹ اپ ایکو سسٹم نا نیام اٹ پول اس تفے و پاکستان نا روشنا آخبت کن اواری اٹ کاریم کننگ کیر۔ سفیر مسعود خان پارے کہ پاکستان نا 64 درسد آن زیات آبادی 30 سال آن کم وئی نا ءُ و نیامی تپہ ٹی ودکی مننگ ءِ ہرانا زوت دہ کروڑ اسکان سرمننگ نا گمان ءِ۔ ورنا و ودوک آ نیامی تپہ نا اواری اٹ کاریم کننگ آن ملک اٹی آئی ٹی بشخ انا شونداری نا روشنا گمان ءِ۔ اوپارے کہ تدوک آ 18 تُو تیٹی پاکستان اٹی ٹیک سٹارٹ اپس بنداوی وڑاٹ امریکہ غان نیمہ بلین ڈالر کٹیاکرینے و دا بشخ ساڑی آ دہائی ٹی کیہی ارب ڈالر کٹیا کننگ کن تیار ءِ۔ مسعود خان پارے کہ حکومت پاکستان ٹیک انڈسٹری کن دوست چاگڑد اس ودی کننگ کن گام گیج آتے برجاتخک۔
