اقوام متحدہ ٹی پاکستان نا آخبتی مندوب منیر اکرم نا سلامتی کونسل اٹی دے ٹک نیامی نا حالیت آتیا شرہ ٹی تران

اقوام متحدہ۔ 26 اپریل (اے پی پی) پاکستان اقوام متحدہ نا سلامتی کونسل اٹ وتواجہ فلسطینی ریاست اسے نا ٹہیفنگ آ مبنی دوریاستی ایسر ءِ دے ٹک نیامی جھیڑہ نا اسٹ انگا ایسر گوندانے و پارینے کہ روچہ مبارک اٹی مسجد الاقصیٰ ٹی اسرائیل نا کنڈآن فلسطینی نمازی تا برخلاف جلہو انسانی حق انا کانود و انسانی اصول آتا خوفناک خلاف ورزیک ءُ ہرافتے بایدے چٹر۔ اقوام متحدہ ٹی پاکستان نا آخبتی مندوب منیر اکرم تدوک آ دےسلامتی کونسل اٹ دے ٹک نیامی نا حالیت آتیا شرہ ٹی تینا تران اٹی پارے کہ مقبوضہ فلسطین نا علاقہ غاتیٹی اسرائیل  نا کنڈآن یہودی آبادکاری کن فلسطینی ڈغار و جائیداد آتیا کوزہ کودک فلسطینی چنا، نیاڑی و نرینہ غاتیا بیدادی، غزہ نا بند کننگ و مسجد الاقصیٰ نا بے حرمتی سلامتی کونسل نا قرارداد آتا سنگین خلاف ورزیک ءُ۔ اومقبوضہ بیت المقدس اٹ اسرائیل نا کنڈآن سد آ فلسطینی شاری تے بیدادی کرسا ٹھپی کننگ و چندی شاری تا شہیدی آ گڑتی نا درشانی ءِ کرینے۔ اوپارے کہ کوزہ گیر ریاست اسرائیل و مقبوضہ و مظلوم فلسطینی الس نا نیام اٹ ہچ ءُ اخلاقی، کانودی یا سیاسی بریبری اس اف۔ پاکستانی مندوب منیر اکرم پارے کہ فلسطینی تا حق خودارادیت نا جہد و اقوام متحدہ نا سلامتی کونسل نا قرارداد آتیا عملدرآمد جاچ و مقبوضہ فلسطینی الس آ اسرائیلی جور ناروا ءِ۔ اوپارے کہ اسرائیلی کوزہ ءِ برقرار تخنگ آن دا مقدس سرزمین اٹ امن مننگ کپک۔ اگہ فلسطینی شری اسرائیل نا دوتے اٹ بے دخل و بے اختیار مریر تو فلسطینی تا ہر بروک آ چین تینا آجوئی و بنداوی حق حق خودارادیت نا دوئی کننگ نا جہد ءِ برجاتخک۔ پاکستانی مندوب منیر اکرم پارے کہ فلسطین اسرائیل جھیڑہ نا اسٹ انگا ایسر اسہ وتواجہ، کیبی و قابل عمل دا فلسطینی ریاست نا جوڑ کننگ ءِ ہرا 1967 آن مست انا امنا مروک سیم تیا تالان داوڑنا ملوک علاقہ و قبول مروک دنگ اٹی مرے ہرانا دارالحکومت القدس شریف مرے  دا مسخت ءِ دوئی کننگ کن امن ءِ بایدے بحال کننگے۔