اقوام متحدہ۔ 21 اپریل (اے پی پی) پاکستان اقوام متحدہ نا سلامتی کونسل نا آخبتی باسک آتا کچ اٹی ودکی نا اسہ وار ولدا مخالفت ءِ کرسا زور شاغانے کہ  سلامتی کونسل نا اول سرآن تنظیم نا چرجوئی ٹی بھلو وخت اسے آن برجا مذاکرات اٹ تعطل نا مون ءِ توننگ کن اقوام متحدہ نا غٹ باسک ملک آتا نیام اٹ درکار امنائی سلاہ دوئی کننگ کن لچک نا گرج ءِ۔ اقوام متحدہ ٹی پاکستان نا آخبتی مندوب منیر اکرم سلامتی کونسل اٹ اصلاحات اتنگ کن کاریم کروک آ اقوام متحدہ نا بین الحکومتی مذاکرات نا ریاستی ٹولی (آئی جی این) نا دیوان اٹی بھارت ، برازیل، جرمنی و جاپان نا بابت پارے کہ سلامتی کونسل نا اصلاحات نا پیش رفت اٹ سست روی وڑوڈول یا عمل اٹ اسہ وڑاسے نا ہم کمتی نا سوب آن اف بلکن دانا سوب گڑاس  ریاست آتا غیر لچکدارانہ موقف ءِ ہرانا مسخت ریاست آتا وتواجہ بریبری تا اصول نا جاگہ غا سلامتی کونسل اٹ اسہ بڑزکو و آسودہی یافتہ ہند اس دوئی کننگ نا تینا قومی عزم ءِ پورو کننگ ءِ۔ جی 4 ملک آک ، بھارت، برازیل، جرمنی و جاپان  اقوام متحدہ نا سلامتی کونسل اٹ آخبتی نشست آتیٹی ودکی نا مخ تفی ءِ کننگ ءِ وخت اس کہ پاکستان و اٹلی نا سرکڑدہ غاتیٹی امنائی سلاہ کن اتحاد(یو ایف سی) پنی آ پڑک آخبتی باسک آتا کچ اٹی ودکی نا مخالفت کننگ ءِ۔ سلامتی کونسل دا وخت آ 5 آخبتی باسک ملک برطانیہ، چین ، فرانس روس و امریکہ وخت اس کہ 10 بے آخبتی باسک آتیا تالان ءِ۔ پاکستانی مندوب منیر اکرم اقوام متحدہ نا سلامتی کونسل اٹ بے آخبتی باسک آتا کچ اٹی ودکی نا مخ تفی ءِ کرسا پارے کہ امنائی سلاہ کن اتحاد(یوایف سی) ٹولی اصلاحات کن بھاز لچک نا درشانی ءِ کرینے ہراڑآن غٹ  باسک ریاست آتیٹی دا بابت امنائی سلاہ ودی مننگ کیک۔