واشنگٹن۔ 15 اپریل (اے پی پی) امریکہ اسہ وار ولدا پارینے کہ پاکستان اٹی عمران خان حکومت نا برطرفی کن پاننگوک امریکی سازش نا دوبہ غاتیٹی ہچ ءُ راستکی اس اف، و امریکی حکومت دا بابت پاکستانی فوج انا ترجمان نا ساڑی آ بیان آن متفق ءِ ہراٹی پاننگانے کہ قومی سلامتی کمیٹی نا اعلامیہ ٹی ہچ ءُ سازش اسے نا ذکر اف ولے دا ذکر ءِ کہ غیر سفارتی زبان ءِ کاریم اٹ اتنگا۔ جرمن نشریاتی ادارہ ڈی ڈبلیو نا رداٹ امریکی محکمہ خارجہ نا ترجمان نیڈ پرائس معمول نا پریس حوال اٹی پاکستان فوج انا ترجمان نا پریس حوال نا بارواٹی اسہ سوج اسے نا ورندی ٹی پارے کہ نن اوڑآن امنا کینہ۔ ہرا تم نیڈ پرائس ءِ پاننگاکہ پاکستان نا مسکوہی وزیراعظم عمران خان تینا دعویٰ غا سلوک ءِ و داسہ ہم امریکہ غا ہی دوبہ بیٹ کننگ ءِ تو اوپارے کہ دا بابت ننا کلہو پیدوار ءِ، دا دوبہ غاتیٹی ہچ ءُ راستکی اس اف ۔ نن آئینی و جمہوری قدرم، ہرافتے ٹی انسانی حق ہم اوار ءِ، نا پرامن پاسداری نا مخ تفی ءِ کینہ۔ اواسہ وار ولدا زور شاغساپارے کہ نن پاکستان یا دنیا ٹی اسہ جاگہ سے آ ہم اسہ سیاسی جماعت اسے آ ایلو ءِ اولیت تفنہ۔ امریکی وزارت خارجہ نا ترجمان نا پاننگ ئس کہ امریکہ پاکستان اٹی امن و شونہالی نا مون آ دننگ کن پاکستان نا حکومت تون اواری اٹ کاریم ءِ برجاتخک۔ نیڈ پرائس پارے کہ امریکہ و پاکستان نا تعلقداری تدوک آ 75 سال آن اہم رہینگانے و واشنگٹن اسلام آباد تون اواری اٹ پاکستان و ڈیہہ ٹی امن و شونداری کن کاریم کننگ کن تیار ءِ۔ اوپارے کہ پاکستان تون تعلقداری تا است خواہی نا رداٹ امریکہ پوسکن گچین مروک آ وزیراعظم شہباز شریف نا پوسکن آ حکومت نا جوڑ مننگ آن پد اودے مبارکبادی نا کلہو گدریفے۔ نیڈ پرائس نا پاننگ ئس کہ نن پاکستان اٹی امن و شونہالی نا مون آ دننگ کن پاکستان نا حکومت تون اواری اٹ کاریم ءِ برجاتخنہ و ہندا نیت اٹ نن وزیراعظم شہبازشریف ءِ پاکستان نا پارلیمان نا کنڈآن گچین کننگ آ مبارکبادی تسن۔ یات سلے کہ پاکستانی فوج انا ترجمان میجر جنرل بابر افتخار پنچ شنبے نادے آ پریس کانفرنس اٹی پاریسس کہ قومی سلامتی کمیٹی نا اعلامیہ ٹی ہچ ءُ سازش اسے نا ذکر اف ولے دا ذکر ءِ کہ امریکہ نا کنڈآن غیر سفارتی زبان ءِ کاریم اٹ اتنگا۔
