جمہوریہ کانگو امن مشن ہیلی کاپٹر شکست، اقوام متحدہ ٹی پاکستان نا آخبتی مندوب منیر اکرم نا پاکستانی فوجی تا شہیدی آ است ہسونی نا درشان

اقوام متحدہ۔ 30 مارچ (اے پی پی) اقوام متحدہ ٹی پاکستان ناآخبتی مندوب منیر اکرم جمہوریہ کانگو ٹی اقوام متحدہ نا امن مشن نا ہیلی کاپٹر شکست اٹی پاکستانی فوجی تا شہیدی آ است ہسونی نا درشانی ءِ کرینے۔ اواسہ بیان اسے ٹی امن مشن نا ہیلی کاپٹر شکست آ است ہسونی نا درشانی ءِ کرسا پارینے کہ ہیلی کاپٹر شکست اٹی 6 نرزور پاکستانی امن کارندہ شہیدی نا جام ءِ نوش کرینو۔ اوجمہوریہ کانگو ٹی اقوام متحدہ نا امن مشن اٹی تعیناتی ٹی تینا جان تا قربانی ءِ تسر۔ اوشہید آتا خاہوت آتون ہڑزخواہی نا درشانی ءِ کرسا پارے کہ او ڈکھیانا داساہت اٹی اوفتے تون ءِ۔ اوفتے مدام تینا دعاتیٹی یات تخنہ۔ ایلو کنڈآ اقوام متحدہ نا سیکرٹری جنرل انتونیوگوتریش پاکستانی سفیر منیر اکرم تون ٹیل فون آ گپ وتران کرے و شکست نا جامع و شفاف جاست وپاست نا باوری کرفے۔