کابل۔ 07 مارچ (اے پی پی) اوغانستان نا قائم مقام وزیر خارجہ مولوی عامر خان متقی اوغانستان کن اسلامی کمکار تنظیم (او آئی سی) نا خصوصی مندوب طارق علی بخیت تون اوڑدہی کرے۔ اوڑدہی ٹی تدوک آ سال دسمبر اٹی پاکستان نا دارالحکومت اسلام آباد اٹی مروک آ اسلامی کمکار تنظیم نا اہم دیوان نا قرارداد آ عملدرآمد نا بابت او آئی سی نا کنڈآن کروک آ کوشست آتیا گپ وتران کننگا وخت اس کہ او آئی سی نا کنڈآن اوغانستان کن انسانی ہمدردی نا ٹرسٹ فنڈ انا کانودی عمل، انسانی ہمدردی و شونداری امداد تون اوار اوار اوغانستان اٹی مروک آ مثبت پیش رفت آ ہم گپ وتران کننگا۔ چینی خبررساں ادارہ نا رداٹ اوغان وزارت خارجہ دوشنبے نادے آ جاری اسہ بیان اسے ٹی پارے کہ او آئی سی نا خصوصی مندوب طارق علی بخیت پارے کہ او آئی سی اوغانستان نا مخ تفی و اوغان الس نا گرج آتا فکر کیک ہنداخاطرآن او آئی سی کابل اٹ تینا دفتر ءِ دُوار ہ ملانے و او اوغانستان اٹی دُوارہ کاریم نا بناءِ کرینے۔ اوپارے کہ کابل اٹی او آئی سی نا دفتر اوغانستان و جہانی شریدار آتون تنظیم نا انسانی ہمدردی نا کوشست آتے مربوط کیک۔ اوپارے کہ او آئی سی جمعہ نادے آ کابل اٹی تینا دفتر ءِ دُوارہ ملاسس و اومیت ءِ کہ او آئی سی نا سرجزآتا دوارہ بنامننگ آن تنظیم چندی بشخ آتیٹی اوغان الس نا کمک کن تینا زمواری تے پورو کننگ کیک۔
