اقوام متحدہ ۔ 22 فروری (اے پی پی) اقوام متحدہ ٹی پاکستان نا آخبتی مندوب و پدتموک ملک آتیا تالان جی 77 پڑک نا چیئرمین منیر اکرم پارینے کہ جی 77 پڑک ءِ انٹرنیٹ آ خار و غلط معلومداری تا تالانی کن انفارمیشن اینڈ کمیونیکیشن ٹیکنالوجیز (آئی سی ٹیز) نا غلط کاریم اٹ اتنگ آ بھاز گڑتی ءِ و دا کچ ءِ توننگ نا گرج ءِ و اگہ اودے تننگتو تو دا کچ ءِ مخلوق ءِ ریفنگ و نسل پرستی، زینو فوبیا(درملکی تیان خار)، منفی و قیانوسی تصور، بدنامی و غٹ آن خطرناک داکہ مخلوق نا پرائیویسی نا خلاف ورزی کن کاریم اٹ اتنگ مریک۔ داہیت انا درشانی ءِ او تدوک آ دے اقوا م متحدہ نا سیکرٹری جنرل نا ’’ننا اسیجائی ایجنڈا‘‘ غا اسہ سیشن اسے ٹی کرے ہراکہ اسہ تاریخی پوسکن ءُ رپورٹ اسے، ہراٹی ایلو زموار آتیان بیدس کثیرالجہتی نا پوسکنی نا خواست کننگانے۔ اوپارے کہ جی 77 غلط معلومداری نا تالانی ءِ توننگ نا چرجوئی ٹی جہانی کمکاری ءِ مون آ دننگ کن سیکرٹری جنرل نا کوشست آتا ستاءِ کیک و سلاہ ئی جہانی ضابطہ اخلاق ہرا السی معلومداری ٹی راست بازی ءِ مون آ دیک۔ اوپارے کہ دا چرجوئی ٹی پین وضاحت نا گرج ءِ۔ اوپارے کہ جی 77 و چین داہیت آ یخین تخک کہ نسل پرستی، نسلی امتیاز، زینوفوبیا(درملکی تیان خار) و تعلقدار بے سگی انسانیت نا توہین ءِ و داہیت آ افسوز ءِ کہ لکھ آ مخلوق دانا گواچی مننگ ءُ ہنداخاطرآن دا کچ آتے توننگ کن 2001 اٹی کروک آ گام ڈرب ڈیکلریشن اینڈ پروگرام آف ایکشن (ڈی ڈی پی اے) نا نفاذ ءِ پک کننگ نا گرج ءِ۔ اوپارے کہ پڑک نا مَننگ ءِ کہ دا چرجوئی ٹی جہانی آجو ماہرمیکانزم نا جوڑ کننگ جہانی کہول آکانود نافذ کروک آ ادارہ غاتا رداٹ نسلی انصاف و بریبری کن اسہ بدلی اسے مون آ دننگ کیک۔ اوپارے کہ پڑک ءِ ایشیائی باتی خاص وڑاٹ زالبول و مسن تتون اوار نسلی گروہ، اقلیت و ایلو پڑک آتیان تعلق تخوک آ بندغ آتے کورونا نا دین اٹی نسل پرستانہ بیدادی، بیدادی نا خطرہ، امتیازی سلوک و رسوائی نا شست کننگا۔ اوپارے کہ جی 77 نا مَننگ ءِ کہ ڈیجیٹل کمکاری جامع ڈیجیٹل زرگزران ، ڈیجیٹل نیٹ ورکس و رابطہ غاتسکان رسینگ، ٹیکنالوجی نا گدریفنگ، ڈیجیٹل انفراسٹرکچر اٹی زرکاری، ڈیٹانا رکھ، مصنوعی ذہانت ، انٹرنیٹ نا ٹکراؤ آن بچنگ، غلط معلومداری تا تالانی ءِ توننگ و غٹ اکن 2030 نا ایجنڈا نا دوئی کننگ نا رداٹ ڈیجیٹل آخبت کن اسیجائی اصول آتا خاکہ اس تیار کننگ نا گرجءِ۔ اقوام متحدہ ٹی پاکستانی مندوب منیر اکرم پارے کہ پدتموک ملک آتیٹی ڈیجیٹل ٹیکنالوجیز نا شونداری کن تکنیکی ویل آتا بے گرج سیاست آن پاناد کننگ المی ءِ تانکہ، انصاف اٹ، جامع و غیر امتیازی یا بریبر چاگڑد ءِ مون آ دننگ مرے۔
