اقوام متحدہ ۔ 09 فروری (اے پی پی) اقوام متحدہ ٹی پاکستان نا آخبتی مندوب منیر اکرم پارینے کہ اقوام متحدہ نا سلامتی کونسل نا بے آخبتی نشست آتیٹی ودکی بریبر علاقائی نمائندگی ءِ پک کننگ نا اسٹ انگا وڑوڈول ءِ۔ اوپارے کہ پاکستان اقوام متحدہ نا سلامتی کونسل نا آخبتی باسک آتیٹی ودکی نا سختی اٹ مخالفت ءِ کیک و داٹی پین بے آخبتی نشست اوار کرسا 15 باسکی باڈی ٹی علاقائی پڑک آتا بریبر نمائندگی نا خواست نا درشانی ءِ کیک۔ سفیر منیر اکرم پارے کہ سلامتی کونسل نا اصلاحات ءِ علاقائی نمائندگی ٹی ساڑی بے بریبری ءِ بایدے مُرکننگے۔ کم نمائندگی والا علاقہ غاتا نمائندگی ٹی ودکی کننگے و زیات نمائندگی والا علاقہ غاتا نمائندگی ٹی ودکی بایدے ودکی کننگپ۔ اوپارے کہ پاکستان و اٹلی نا کماشی ٹی امنائی سلاہ ودی کروک آ سیوت (یوایف سی) بے آخبتی باسک آتیٹی علاقائی بنداو تیا 11 آن ہلیس 12 نشست آتا بشخنگ نا سلاہ تسنے ہراڑآن ہر علاقہ نا بریبر نمائندگی پک مریک۔ اوپارے کہ بین الحکومتی مریس مذاکرات نا مسخت 15 باسکی سلامتی کونسل اٹ اصلاحات اتنگ ءِ۔ امنائی سلاہ ودی کروک آ سیوت بے آخبتی باسک آتیٹی کننگ نا ہرا سلاہ ءِ تسنے اونا رداٹ اودے جنرل اسمبلی وقتا فوقتا گچین کیک ہرا زیات جمہوری عمل اس مریک۔ اومستی پارے کہ دا بنداوی وڑاٹ پڑک آف فور (ہندوستان ، برازیل، جرمنی و جاپان) آن جتا ءِ ہرانا باسک آک حق انا باندات نا وڑاٹ آخبتی نشست آتا دعویٰ کیرہ۔ اوپارے کہ داحق خوداستحقاق نا احساس آن ودی مسنے۔ منیر اکرم پارے کہ جی فور نا دعویٰ نئے بیرہ اقوام متحدہ نا چارٹر نا باسک ملک آتا بریبر وتواجہی نا اصول نا نئے بیرہ خلاف ورزی ءِ بلکن دا غیر جمہوری ہم ارے۔ سے شنبے نادے آ مروک آ شرہ ٹی پوسکن آ حقیقت آتا بابت و گڑاس مخلوق نا کنڈآن سلامتی کونسل اٹ مروک آ دعویٰ تا بارواٹ سفیر اکرم پارے کہ چنکا و نیامی ریاست آک آخبتی رکنیت دوئی کننگ ناخواہنداری تیان کیہی زیات قابل قدر مسنے۔ اوکونسل نارکنیت نا حق انا دعویٰ کننگ نا ہم اہل اف۔ سلامتی کونسل اٹی اصلاحات کن فروری 2009اٹی جنرل اسمبلی ٹی پنچ اہم بشخ، رکنیت نا زمرہ ، ویٹو نا سوج، علاقائی نمائندگی، ودکی مروعک سلامتی کونسل ناکچ، و کونسل ناکاریم کننگ نا وڑوڈول، و جنرل اسمبلی تون اونا تعلق آ پورو مذاکرات بناکرے۔
