کابل۔ 03 فروری (اے پی پی) اوغانستان نا وزیرخارجہ امیر خان متقی پارینے کہ اوغان حکومت جہانی کہول آ امنا کننگ نا خڑک آٹے ولے اوغان حکمران تینا شڑت آتیا رعایت آتے دوئی کننگ ءِ اولیت ایتک۔ فرانسیسی خبررساں ادارہ نا رداٹ او اوسلو مذاکرات آن پدی بننگ آن پد تدوک آدے تروک آ تینا اولیکو انٹرویوٹی امریکہ غا زور شاغا کہ او اوغانستان اٹی انسانی تنکی ءِ توننگ کن اوغانستان نا منجمد کروک آ میرات آتے بحال کے۔ اوپارے کہ اوغانستان نا پوسکن آ حکمران تے کرارکرار آ جہانی کہول آ امنا کننگ انگ ءِ و اوغان حکومت جہانی کہول آ امنا کننگ نا عمل نا خڑک آٹے۔ اوپارے کہ دا ننا و اوغان الس نا حق ءِ و داڑکن نن ہمووخت اسکان تینا سیاسی کوشست آتے برجاتخنہ ہراتم اسکان نن تینا حق ءِ دوئی کتنون۔ اوپارے کہ اوغان حکومت جہانی برادری تون متحرک رابطہ ٹی ءِ ہرا اوغان حکومت نا ودوک آ توثیق نا کنڈآ پیدوار اشارہ اسے۔ اوغان وزیر خارجہ پارے کہ جہانی برادری ننتون رابطہ تخنگ نا است خواہ ءِ و نن اوٹی جوان ءُ سرسہبی دوئی کرینن۔
