اقوام متحدہ۔ 27 جنوری (اے پی پی) اقوام متحدہ ٹی چین نا آخبتی نمائندہ ژانگ جون اوغانستان ءِ پین انسانی و اقتصادی امداد تننگ نا خواست کرینے۔ چینی خبررساں ادارہ نا رداٹ ژانگ جون اوغانستان نا حالیت آتیا سلامتی کونسل نا دیوان آن تران کرسا پارے کہ چین جہانی برادری آن دمدستی وڑاٹ اوغانستان کن پین انسانی و اقتصادی امداد نا خواست کیک تانکہ اوغان الس ءِ مون تروک ویل آتے ایسر کننگ اٹ کمک فراوان کننگ مرے۔ اوپارے کہ تدوک آ سال اگست اٹی درملکی فوج آتا عجلت اٹی پیش تمنگ آن پد آن اوغان زرگزران زوال نا گواچی ءِ و اوغان آبادی بدترین وڑنا انسانی تنکی تتون مون تننگ ءِ۔ اوپارے کہ 95 درسد اوغان خاہوت خور آن محروم ، 10 لکھ آن زیات غذائی کاختی و 23 ملین بندغ قحط نا گواچی ءُ۔ اوپارے کہ دا کچ آن سال انا نیمہ اسکان ، اوغان آبادی نا 97 درسد نیزگارمریک و 2 امریکی ڈالر ہڑدے ئی آ وخت ءِ تیر کننگ نا قابل مفک۔ اوپارے کہ بدبختی اٹ اوغانستان اٹی انسانی تنکی ٹی ہچ ءُ بنداوی ءُ بدلی اس بتنے۔ اوپیدوار کرے کہ پیدوار وڑاٹ داٹی ہچ ءُ کانودی اڑاند اس اف بلکن دا اسہ سیاسی ءُ ویل اسے و داسیاسی ویل اٹ 38 ملین اوغان تا زند اتون گوازی کننگ انگ ءِ ہرافتے امداد نا سخت گرج ءِ۔ اوپارے کہ چین اوغانستان کن مالی کمکاری پٹنگ کن جہانی بینک و ایلو جہانی ادارہ غاتا کوشست آتا ستاءِ کیک۔ اوپارے کہ اوغانستان آ اسہ کنڈی پابندی فوجی نیام تمنگ آن کم مہلک اف۔ اوداوخت آ اوغانستان نا میرات آتے منجمد کننگ و اوغانستان نا برخلاف اسہ کنڈی پابندی تے دمدستی وڑاٹ ہرفنگ آ زور شاغا۔ اومستی پارے کہ اوغان سرکڑدہ و اوغان ملکیت نا اصول آ عمل کننگ نا مطلب پک وڑاٹ اقتصادی وسیلہ غاتا اوغان ملکیت و سرکڑدہ غاتا شرف ءِ کننگ ءِ۔
