اسلام آباد۔ 26 جنوری (اے پی پی) اقوام متحدہ ٹی پاکستان نا آخبتی مندوب منیر اکرم پارینے کہ بھارت دہشت گردی آن زہمی اف بلکن سویلی ایشیاٹی دہشت گردی ءِ مون آ دننگ ءِ۔ کشمیر میڈیا سروس نا رداٹ منیر اکرم سلامتی کونسل آن تران کرسا پارے کہ بھارت 1989 آن داتم اسکان تینا غیرکانودی کوزہ گیری ٹی جموں و کشمیر اٹی 96 ہزار آن زیات کشمیری تے شہید کرے وخت اس کہ داوخت آ مقبوضہ علاقہ ٹی کم و ود 23 ہزار زالبول ءِ جنوزان، 11 ہزار آن زیات زالبول آتا بے حرمتی ءِ کننگا و اسہ لکھ ہند و اسکول آتون اوار ایلو ماڑی تے بھس کننگا۔ منیر اکرم پارے کہ 5 اگست 2019 آن پد آن جموں و کشمیر اٹی 9 لکھ آن زیات بھارتی فوجی تعینات ءِ وخت اس کہ بے گناہ کشمیری ورناتے عدالت آن ایڑتر کسفنگ کن جعلی مقابلہ غاتا سیبو ءِ ہلنگ انگ ءِ، کشمیری تا ملکیت آتے بھس و خاخر ترسا اوفتے اجتماعی سزا تننگ انگ ءِ۔ اوپارے کہ بھارتی فوجیک خطرناک پیلٹ گن ءِ کاریم اٹ اتسا سد آ کشمیری چناتے نابینا کرینو وخت اس کہ 13 ہزار کشمیری ورناتے زوروکی اٹ دزگیر کننگا و جموں و کشمیر ءِ مسلم گیشتری ریاست آن ہندو گیشتری علاقہ ٹی بدل کننگ نا عمل برجاءِ۔ منیر اکرم پارے کہ پاکستان تدوک آسال اسہ جامع و پٹ وپول مروک ڈوزیئر اس شیئرکریسس ہراٹی 1989آن بھارتی کوزہ گیر فوج انا جنگی ڈوہ تا مسہ ہزار 432 واقعہ غاتا آڈیو و ویڈیو شاہدی تے اوار کننگاسس۔ اوسلامتی کونسل آن خواست کرے کہ او دا ڈوہ تا پک شاہدی تا نوٹس ءِ ہلے و جنگی ڈوہ و جہانی انسانی کانود نا بھلا خلاف ورزی تیا بھارتی کارندہ غاتے جوابدہ گوندے۔ پاکستانی مندوب پارے کہ بھارت دہشت گردی نا گواچی اف بلکن بھارت سویلی ایشیاٹی دہشت گردی ءِ مون آ دننگ ءِ وخت اس کہ پاکستان 2014 آن انسداد دہشت گردی نا کارروائی تیان تینا گل زمین ءِ دہشت گردپڑک آتیان پاک کرے۔ اوپارے کہ بھارت پاکستان نا برخلاف دہشت گردی نا کارروائی تا سرپرستی، مالی کمکاری و مخ تفی ءِ کننگ ءِ، ہرافتے ٹی پاکستان نا برخلاف گل زمین آن مروک آ دہشت گردی ہم اوار ءِ، بھارتی اودیم ایجنسی نا کمک اٹ ٹی ٹی پی و جے یو اے پاکستان اٹ دہشت گردی ٹی اوار ءِ۔ اوپارے کہ 2020اٹی پاکستانی فوجی و شاری تا برخلاف اسہ ہزار آن زیات سیم پار دہشت گرد جلہو کننگا، بھارت 29 جون 2020 آ کراچی اسٹاک ایکسچینج تون اوار پاکستانی فوجی و شاری ہدف آتیا جلہو آتیٹی کمکاری کرے، بھارت سلامتی کونسل نا فہرست اٹی اوار دہشت گرد ادارہ غاتا مالی اعانت و مخ تفی ءِ کرے، 23 جون 2021آ لاہور و 14 جولائی 2021 آ داسو ٹی چینی و پاکستانی انجینئر آتا خون ءِ کرے۔ منیر اکرم سلامتی کونسل نا چکار ءِ فروری 2020اٹی نئی دہلی ٹی مسلم مخالف قتل عام نا کنڈآ ہم مبذول کرفے۔ اوپارے کہ بھارت اٹی ہڑدے نا بنداو آ مسلمان تا ٹارگٹ کلنگ کننگا، تدوک آ سال بھارت اٹی عیسائی گرجاگھر تیا 400 جلہو کننگا ۔ پاکستانی مندوب پارے کہ اِرا ہفتہ مست ہندو انتہاپسند آتا کنڈآن بھارت نا مسلمان تا نسل کشی نا پڑو کننگا، سلامتی کونسل جنیو سائیڈ واچ نا سروک نا ہیت انا بایدے نوٹس ءِ ہلے کہ بھارت اٹ نسل کشی مننگ کیک۔
